Xanana Susesór Francisco Xavier no Nicolau Lobato

DILI, www.news-viptv.com – Prezidenti Republika, Dr. Jose Ramos Horta hateten, Xanana Gusmao nudar susesor proklamador Francisco Xavier do Amaral no Nicolau Lobato tamba susesu lori Timor-Leste ba ukun rasik an.

“Ha’u hato’o omenajen ba Xanana Gusmão, susesór Francisco Xavier do Amaral no Nicolau Lobato nian, tanba matenek no aten-barani hodi mobiliza povu, iha rekonstrusaun no reorganizasaun FALINTIL, hodi kria kondisaun sira ne’ebé kulmina iha Konsulta Populár iha loron 30 fulan-Agostu tinan 1999,” deklara PR Horta iha nia diskursu estadu hafoin simu posse, Sexta (20/5/2022), iha Tasi Tolu, Dili.

Timor-Leste ohin, PR Horta esklarese, sai nu’udar baze ba pás no solidariedade. Tamba ne’e, atu alkansa pás rohan-laek, ne’ebé orienta hosi Maun Boot Xanana iha sintonia hamutuk ho lideransa nasionál tomak, tenki hili determinamente ba rekonsilisaun nasionál no rejeisaun ba justisa retributiva hosi manan-na’in sira.

“Ita moris iha demokrasia imperfeita maibé pasífika sein iha rejistu ba tipu violénsia polítika, étnika ka relijioza ruma, relijiaun predominante sira oin-oin iha ita-nia rain moris ho espíritu fraternidade tomak,” nia dehan.

Hahú hosi baze trankuilidade ida-ne’e, nia reafirma nia empeñu atu kombate ba pás no ba fraternidade umana iha nível nasionál, rejionál no internasionál, independentemente hosi ideolojia sira, relijiaun ka organizasaun sosiál.

Iha parte seluk, xefi estadu ne’e mos louva ba esforsu Xanana ho nia ekipa tomak hosi Gabinete Fronteira Marítima no Terrestre tanba esforsu, intelijénsia no dedikasaun ne’ebé rezulta iha selebrasaun tratadu internasionál ne’ebé konfirma liña mediana ida iha Tasi Timór hanesan fronteira marítima permanente entre Austrália no Timor-Leste.

“Rekoñesimentu hanesan mós hato’o ba parte Austrália nian ne’ebé lidera hosi Ministra Negósiu Estranjeiru, Julie Bishop ba nia (Xanana) sinseridade       no determinasaun atu      resolve disputa ne’ebé afeta tiha ona relasaun entre rai rua ne’e,” dehan xefi estadu.

PR Horta mos sauda Komandante Taur Matan Ruak ne’ebé lidera transformasaun gerrilla Rezisténsia Nasionál ba Forsa Armada iha kumprimentu ba misaun atu halo defeza ba soberania nasionál.

Laos deit Xanana no Taur, xefi estadu mos sauda Tenente-Jenerál Lere Anan Timur ne’ebé lidera tranzisaun foin lalais F-FDTL nian ba jerasaun foun ofisiál superior sira. Hosi jerasaun foun ne’ebé reprezenta hosi XEMJ foun Tenente-Jeneneral Falur Rate Laek, Major-Jen. no Vise-XEMJFA Calisto Coliati no Komodoro Pedro Klamar Fuik.

“Ita-nia rain no F-FDTL hein hela atu iha kontinuasaun ba modernizasaun Forsa Defeza nian no nia adaptasaun konstante ba dezafiu foun sira ne’ebé ita tenke hatene bebeik atu antesipa,” dehan PR Horta.

Nune’e mos xefi estadu ne’e hato’o agradesimentu kle’an liu ba rai belun sira hotu tanba sira-nia solidariedade jeneroza.

“Sira la’o hamutuk ho ita-nia povu hahú  hosi tempu naruk sira nakukun nian to’o ita sa’e ba iha Foho Ramelau tutun, hanesan rai independente no iha dame nia laran. Sira tulun ita bainhira buat hotu sei nakukun, sira fó-han ita bainhira ita hamalaha, sira fó-hemu ita bainhira ita hamrok. Povu Timor- Leste sei la haluha sira,” dehan PR Horta.

Timor-Leste privilejia entendimentu internasionál ne’ebé bazeia iha kooperasaun no interdependénsia atu hamutuk hasoru dezafiu komun sira: promove pás no rekonsiliasaun; prezerva Rai enkuantu sai Uma Komun ba Umanidade, hodi trava alterasaun  klimátika sira no prezerva Rai Inan; halakon eskravatura infantil no ki’ak rabat-rai. Buat sira-ne’e tenke sai valór orientadór sira ba ita-nia relasaun internasionál.