Sensibiliza Lei Kodigu Prosesu Penal, PNTL Sei Vizita Komunidade no Eskola

DILI, www.news-viptv.com – Polisia Nasional Timor-Leste (PNTL) iha 2024 sei hasa’e atividade vizita komunidade no eskola sira hodi sensibiliza Lei sira kona ba Kodigu Prosesu Penal no servisu Polisiamentu Komunitaria.

Komandante Jeral PNTL, Komisariu Henrique da Costa esplika, atividade vizita komunidade no eskola ne’e hodi halo prevensaun no hamenus mos numeru no aktividade sira ne’ebe kontra lei no ordem publika.

“Komandu orienta ona Komandante sira hotu atu hasa’e aktividade vizibilidade Polísia ninian no mós halo aktividade vizita komunidade no eskola hodi sensibiliza Lei sira kona-ba Kódigu Prosesu Penal no serbisu Polisiamentu Komunitaria,” dehan Komisariu Henrique ba jornalista sira hafoin hasoru malu ho Prezidenti Republika (PR) Jose Ramos-Horta hodi relata situasaun seguransa nian, Tersa (16/1/2024), iha Palasiu Prezidensial, Dili.

Ba numeru krimi ne’ebe aas iha 2023, nia informa, barak liu PNTL rejista númeru ass liu maka Ofensas Integridade Físika simples hamutuk rihun 1 resin.

“Buat sira ne’e akontese tamab ita hatene katak iha Timor ne’e dezempregu ne’e maka’as, entaun tanba ema laiha servisu, ida ne’e mós kontribui Iha parte sira seluk mós, ita hare’e konsiensia ema nian laiha, entaun dala-ruma hadau malu ka disputa rai mós sai hanesan faktor ida ne’ebe maka kontribui mós ba iha krime sira ne’ebe maka akontese,” nia esplika.

Iha hasoru malu ho PR Ramos-Horta, Komisariu ne’e esplika katak, xefi estadu hato’o parabéns no apresiasaun ba PNTL ba esforsu tomak ne’ebe maka membru sira halo, oferese durante Natal no Tinan Foun ninian.