Promove Liberdade Imprensa no Espresaun, Konsellu Imprensa – PNTL Asina Akordu Entendimentu ba Servisu Media

Dili, www.news-viptv.com – Hodi promove Liberdade imprensa no liberdade espresaun iha Timor-Leste, Conselho de Imprensa de Timor-Leste (CI) ho Komandu Jerál Polísia Nasionál Timor-Leste estabelese hikas akordu kooperasaun liu husi asina nota entendimentu, Kinta (21/11/2024), iha Edifisiu KI, Quintal Bo’ot, Dili.

Nota entendimentu ne’e asina entre Prezidente Conselho de Imprensa, Otelio Ote no Komandante Jerál PNTL, Komisáriu Jerál Henrique da Costa. Nota entendimentu refere halo atu garante ezersisiu direitu, liberdade no garantia sidadaun sira nian ne’ebé konstituisaun no lei sira fó protesaun.

Otelio Otte esplika, KI rejista ona orgaun komunikasaun social hamutuk 57 husi plataforma media oi-oin, tantu imprimi, elektronika no online. Husi numeru media ne’e, hamutuk iha jornalista besik 400.

Hare ba numeru media no jornalista ne’ebe iha, KI hare konsidera existensia numeru ne’e kontribui makas ona no iha papel media mak nuudar meius ida atu informa, eduka, kontrola no diverte.

“Ohin iha nee ita sai sasin ba asina entendimentu ho intensaun ida ita rekoñese relasaun PNTL ho media no espesial ho Konselhu Imprensa no instutisionalmente no asuntu pratika  jornalistika inklui mos publikasaun Jornalistiku sei lori ita ba meius komunikasaun jornalista no konaba oinsa PNTL atua no kazu sira ba produtu Jornalistiku,” dehan Otelio Ote ba jornalista.

Iha fatin hanesan, Komandante Geral PNTL, Komisariu Henrique da Costa esklarese, nota entendimentu ne’ebe asina nu’udar kontinuasaun husi servisu ne’ebe halao ona iha tempu Komisariu Faustino Da Costa, no dadauk ne’e aumenta tan asuntu balun ne’ebe KI ho PNTL tenki konkorda iha servisu entre PNTL ho orgaun komunikasaun social sira.

“Ita hare katak importante tebes kontinua akordu ne’e, iha pontus balu ke ita presisa atu hatama tan iha laran atu nune’e bele fo mos ekipa rua neebe mak asina akordu ida nee hodi halo servisu diak liu tan ita hatene katak papel PNTL ne’e importante teb-tebes, maibe papel media ninian mais importante liu, tamba iha situasaun balu ne’ebe maka dalaruma polisia labele tama, media buka meius oinsa bele tama no iha situasaun balu ne’ebe maka polisia labele to ba iha fatin sira ne’e maibe husi imformasaun publika sai hanesan mos meius ida ba komandante sira no membru sira hodi responde kedas ba iha informasaun ne’ebe maka fo sai iha Media ita hare katak ida ne’e importante teb-tebes no ita nafatin respeita ida idak nia knar,” hateten Komisariu Henrique da Costa.

Ema numeru ida iha PNTL ne’e fo hanoin ba jornalista sira wainhira halao knar tenki uza kartaun identidade husi nia media ne’ebe haknar aan ba no publika notisia tuir faktus.

Ho era globalizasaun, Sekretariu Estadu Komunikasaun Social, Expedito Loro Dias Ximenes husu ba media sira mos wainhira publika notisias tenki tais didiak atu nune’e labele notisias lalo’os ne’ebe bele hamosu dezinformasaun.

“Saida mak beke akontese wainhira dezinformasaun iha ID falsu entaun iha ne’e sira husi PNTL nia funsaun mos dala barak kontinua lao iha ne’e, tamba nee mak servisu hamutuk ho ida nee atu bele oinsa Média halao servisu tuir nia papel maka informa, eduka, diverte no halo kontrolu sosial hodi asegura ordem iha publiku,” dehan Expedito Ximenes.