Promove Diretus Humanus no Evita Violensia, CHC Fo Formasaun ba Offisiais PNTL

Dili, www.news-viptv.com – Hare ba istoria pasadu iha prosesu luta ba ukun rasik an ne’ebe nakonu ho istoria violasaun no sofrementu, Centro Nacional Chega! I.P (CHC, I.P) realiza formasaun kona ba Istória, Direitus Umanus no Justisa Tranzitóriu. 

Diretor Ezekutivu CHC, I.P, Hugo Maria Fernandes esplika, objetivu hosi formasaun ne’e maka fo hanoin fali ba membru PNTL hala’o sira nia kna’ar ho lolos tuir lei no orden hodi garante katak sei la akontese violasaun direitus umanus pasadu iha Timor-Leste.

“Centro Chega, nia mandatu ida maka promove diretus humanus, wainhira ita atu promove diretus humanus ita mos persiza hatene istoria diretus humanus ita nia rasik, depois asaun ita nia lor-loron refleta saida maka liu ba. Parte ida hosi justisa tranzitoriu maka atu halo saida makai ta bolu reforma institusional garante atu labele akontese,” dehan Hugo Fernandes iha nia deskursu ba abertura formasaun ne’ebe halao iha Salaun Konferensia Chega, Balide, Dili, Segunda (14/8/2023).

Nia esklarese, estadu maka tenki garante katak violasaun pasadu, violasaun diretus humanus ne’e la akontese tan. Garantia estadu nian ne’e, nia afirma, maka liu hosi instituisaun hanesan PNTL, F-FDTL, servisu intelejensia, tribunal.

“Sira ne’e sira nain 4 maka iha kna’ar importante atu garante violasaun sira ne’e atu la akontese. Entaun ami hein katak ho formasaun sira hanesan ne’e ita nia kuadrus, membru alta polisia nian, forsas armadas nian ita hein neneik bele halo tratamentu justus. Importante liu maka tenki hakotu tiha siklus violensia ne’ebe hamosu hosi entidade estadu nian ida ne’e maka koko atu halo hein ho parseiria ne’ebe lao ona. Neneik-neneik bele fahe konesementu, aprende instituisaun nia knar, fahe responsabilidade hamutuk, oinsa maka ita nia hakarak,” nia dehan.

Iha fatin hanesan, Provedoria Diretus Humanus no Justisa (PDHJ), Virgilio Guterres hateten, buat hotu ne’ebe halo tenki bazeia ba Lei.

“Respeita direitus humanos ne’e importante teb-tebes, tamba ne’e estado tenke tau atensaun ba buat hirak nee hotu,” dehan Virgilio Guterres.

Formasaun ne’e hetan partisipasaun hosi membru PNTL Muniispiu Dili nain 30 ho servisu hamutuk Provedoria Diretus Humanus no Justisa ho PNTL rasik.