DILI, www.news-viptv.com – Reprejentante Programa Nasoens Unidas ba Dezemvolvimentu (PNUD) Katyna Argueta hasoru Primeiru Ministru (PM), Kay Rala Xanana Gusmão hodi atualiza programa ne’ebe lao ona no introdus programa prioridade sira ne’e sei halao iha Timor-Leste.
UNDP maka Ajénsia Nasaun Unidas nian ne’ebé aborda kona-bá dezenvolvimentu ho nia projetu sira iha seitór prinsipál tolu mak hanesan apoia programa desentralizasaun, apoia dezenvolve Balkaun Úniku, no apoia foin-sa’e sira atu partisipa ativu liután iha públiku.
Seitór seluk ne’ebé UNDP apoia maka proteze ambiente, responde bá mudansa klimátika, sustentabilidade no reziliénsia.
“Ami aliña ami-nia programa ho Governu tanba ne’e esensialmente nia hatudu prioridade ida husi prioridade oin-oin, ami hasoru malu ho PM Xanana ko’alia kona-ba prioridade sira iha área dezenvolvimentu nian,” dehan Katyna Argueta ba jornalista sira, Kinta (23/1/2025), iha Palacio do Governo, Dili.