PM Xanana Lansa Programa Futuru Lider ba ASEAN

DILI, www.news-viptv.com –  Ministériu Negósius Estranjeirus no Kooperasaun liu husi Gabinete Vise-Ministra ba Asuntu ASEAN, lansa programa Futuru Lider ba ASEAN, Kuarta (3/4/2024), iha Salaun Multiuzo, Bebora, Dili.

Programa ne’e lansa husi Primeiru Ministru Kay Rala Xanana Gusmão, akompaña husi Sekretáriu-Jerál ASEAN, Dr. Kao Kim Hourn, no Vise Ministra Assuntu ASEAN, Milena Rangel ho membru governu balun.

Objetivu programa Futuru Lider ba ASEAN ne’e mak atu dezenvolve kapasidade foinsa’e Timoroan sira ho idade 23-37 hodi kompriende konaba ASEAN no kontribui iha esforsu sira ba adezaun husi setór oioin.

Iha nia diskursu, Primeiru Ministru Kay Rala Xanana Gusmão hateten katak programa ne’e akontese iha “momentu ne’ebé importante tebes no ida ne’e la’os de’it hanesan sinál ida husi Timor-Leste nia komitmentu ba integrasaun no kooperasaun internasionál no rejionál, maibe mos marka pasu pozitivu ida ba Timor-Leste nian jornada iha dezenvolvimentu nasionál.

Vise Ministra aasuntu ASEAN, Milena Rangel hateten, iha programa ne’e, partisipante sira sei aprende barak konaba lideransa no ASEAN husi peritu nasionál no rejionál sira, no sei hetan experiénsia liu husi vizita ba nasaun ASEAN sira hodi dezenvolve relasaun no koñesimentu.

Entertantu nu’udar partisipante ba programa ne’e, Deonisio Soares no Namodima da Cruz senti kontenti bele involve iha programa ne’e hodi bele prepara an sai lider iha futuru.

Hamutuk Líder foinsa’e 100 mak liu rekrutamentu ho lalo’ok moris hosi setór oioin, inklui sira ne’ebé servisu iha setór públiku, setór privadu, joven empriendedór sira, organizasaun sosiedade sivíl, akademia no ajénsia internasionál.

Kandidatu sira hetan nomeasaun husi instituisaun oioin no selesionadu bazeia ba sira nia aspirasaun ba lideransa iha Timor-Leste no ASEAN, sira nia abilidade hodi estabelese relasaun servisu transforteirisu, no sira nia potensiál hodi kontribui ba área prioridade sira iha rai laran. Kandidatu sira mos tenki-ser profisiente iha lian Inglés iha nível servisu hodi nune’e bele kontribui ba iha diskusaun sira.