Partisipa ARF, TL Sei Apresenta Pozisaun ba Politika no Seguransa

DILI, www.news-viptv.com – Timor-Leste (TL) iha Forum Rejional ASEAN ga ASEAN Regional Forum (ARF) ba dala 29 sei halo apresentasaun kona ba pozisaun TL ba asuntu politika no segurança iha rejiaun Asia Pasifiku nian.

“lha okaziaun refere, Xefe Diplomasia Timoroan ne’e sei hato’o intervensaun no aprezenta Timor-Leste nia pozisaun ba asuntu polítika no seguransa iha rejíaun Azía-Pasífiku,” hakerek komunikadu imprensa ne´ebe redasaun simu hosi Minesteriu Negosiu Estranjeiru no Kooperasaun (MNEK), Sexta (29/7/2022).

ARF ba dala 29 sei realiza iha Phnom Penh, Kambodia, hahú 31 Jullu to’o 6 Agostu 2022 iha Otél Sokha Phnom Penh. Ministra Negósius Estranjeirus no Kooperasaun Repúblika Demokratika Timor-Leste, Adaljiza Magno hamutuk ho nia delegasaun sei partisipa iha Forum Rejionál ASEAN nian ne´e.

Objetivu prinsipál sira hosi sorumutu refere atu promove dialógu konstrutivu no konsulta hodi fo kontribuisaun signifikativa ba esforsu sira atu hametin liután paz no seguransa ba interese komún, mutúa iha rejíaun Azía-Pasífiku.

Alende partisipa iha ARF nian, Ministra Adaljiza Magno hanesan mos bainaka espesiál hosi país anfitriaun Reinu Kamboja, sei partisipa mos iha Sorumutu Ministrus Negósius Estranjeirus ASEAN nian ba dala-55.

lha biban hanesan, Ministra Magno sei hasoru malu mós ho ninia omólogu husi nasaun balun,  no halo enkontru bilaterál ho Países Membru ASEAN no nasaun seluk sira ne’ebé partisipa iha Forum Rejionál ASEAN refere.

Akompaña ministra Magno iha viajem ne´e Diretora-Jerál ba Asuntu ASEAN, Milena Rangel, Diretora ba Asuntu Polítika Seguransa, Elisa da Silva, no Diretór ba Asuntu Ekonomiku Aleixo Gusmão.