OJE 2026, SEKOMS Tau US$ 100,000 Apoia Jornalista Kobertura ba Atividade Primeiru Ministru

DILI, www.news-viptv.com  – Sekretaria Estadu Komunikasaun Sosial (SEKOMS) iha Orsamentu Jeral Estado (OJE) tinan 2026 tau orsamentu ho montante US$ 100,000 ba jornalista sira ba kobertura primeiru ministru nian tantu iha nasional no internasional.

Orsamentu ne’e hato’o husi SEKOMS, Expedito Dias Ximenes ba jornalista sira hafoin aprezenta tetu OJE 2026 nian ba Komite Revizaun Orsamentu (KRO), ne’ebe lidera husi Primeiru-Ministru (PM), Kay Rala Xanana Gusmão, Kuarta (13/08/2025) iha Ministeriu Finansas Aitarak-Laran, Dili.

“Ohin ami mai aprezenta tetu (miliaun US$ 4,5) ida ne’e no ami aprezenta mos adisional 2.5, primeiru atu reforsa no kontinua salario vensimento kontratadu kazual sira 57 iha SEKOMS nian, no atu husu mos nafatin orsamentu 100 mil ba iha SEKOMS atu apoio ba jornalista sira atu halo kobertura ba aktividade Primeiru-Ministru nian, iha nasional nomos iha estranjeirus,” dehan Expedito Ximenes ba jornalista sira.

Ba TATOLI, Ip tinan 2026, iha tetu orsamentu hetan US$ 500,000 nia nia adisional husu US$ 400,000 e tal ne’e orsamentu ne’e sei uza hodi hola ekipamentus digital.

“Ami iha transferénsia ba RTTL no ba asosiasaun jornalista sira ba radio komunidade sira no Centro audio-visual Max Sthall,” nia epslika.

SEKOMS mos orsamentu nafatin iha tinan ida ne’e ba organizasaun hamutuk Jornalista tolu ho assosiasaun radio komunidade nian atu fo formasaun ba jornalista sira.

“Ami mos prioridade ba formasaun jornalista sira ba Lian Portugues liuhusi servisu hamutuk ho institutu Camões liuhusi programa CLJ Tantu ita iha mos orsamentu espesial revizor sira ne’ebe fo ba RTTL no Tatoli.IP no media Online Sira atu nune’e sira mos bele hare’e ba Lian Portugues,” nia dehan.

Ba RTTL, SEKOMS mos husu addisional miliaun US$ 1 ba KRO, atu instala ba tore 3 ne’ebe prontu ona husi Municipiu Lautem, Ainaro, no Bobonaro.

“Tore 3 ne’e agora nia konstrusaun hotu ona hamutuk 100 %, tinan oin sei instala. Tamba ne’e maka ohin ami husu 1 miliaun para tinan oin bele instala tore 3 ne’ebe prontu ona,” nia hateten.

Alende tore 3 ne’e ho nia objetivu atu bele alarga Kobertura RTTL nian iha teritorio laran tomak, iha mos osan adisional US$ 400,000 ba RTTL atu bele atende Kopa mundial iha 2026.