Militar Burkina Faso Halo Golpe Militar Kontra Nia Prezidenti

OUGADOUGOU, www.news-viptv.com – Militar Burkina Faso, nasaun iha Afrika Oeste, reklama an katak susesu halo golpe kontra Prezidenti Roch Kabore no lidera governu, Segunda (24/1/2022).

Tuir pubkikasaun cnnindonesia, Golpe militar ne’e anunsia hosi soldadu ida iha televisaun governu, ne’ebe lee deklarasaun Tanente Koronel Paul-Henri Sandaogo ne’ebe xefia golpe.

Golpe ne’ebe akontese loron ida hafoin tiru malu iha maioria akampamentu militar iha Kapital Ougadougou no besik residensia Preziden Kabore.

Iha tempu hanesan, porta voz Prezidenti Kabore mos desmente katak laiha asaun golpe.Militar reklama golpe lao sem violensia no afirma sira ne’ebe military detein iha fatin ne’ebe seguru.

“Movimentu Patriotika ba Rekoperasaun no Protesaun (MPSR), ne’ebe kompostu tomak parte forsas nian desidi atu hakotu Kabore hosi kargu Preszidenti,” hateten deklarasaun ida ne’ebe publika hosi reuters

Ho golpe ne’e, parte military relata suspende konstituisaun, dissolve governu no parlamentu nasional, inklui taka area fronteira nian.

Dadauk ne’e, situasaun seguransa iha Burkina Faso manas hela, hafoin nasaun ne’e hetan revolta hosi milisia Islamiku sira ne’ebe obriga sidadaun sira atu kumpri Lei Islam Radikal nian.

Kondisaun ne’e rezulta militar la konsege hamate asaun rebelde sira. Sidadaun no military barak maka sai vitima ba disturbu ne’e.

Militar ne’ebe lamenta ho Kabore nian inkapasidade hodi rezolve situasaun ne’e desidi hodi hatun governu.

Golpe ne’e hetan apoiu maioria hosi sidadaun Burkina Faso ne’ebe halo ona manisfestasaun desde fulan hirak liu ba.

Sidadaun atus ba atus maka halibur hamutuk iha Place de la Nation, sentru kapital Ouagadougou hodi hatudu sira nia apoiu ba golpe militar ne’e.

“Ami kontenti los, ami bele sai durante loron rua hodi apoiu forsa sira. Ami iha militar nia kotuk,” dehan Ibrahim Zare, sidadaun ida.

Eli Sawagogo nudar sidadaun ida mos la hakfodak ho golpe ne’ebe akontese.

“Golpe ne’e, ami espera duni akontese tamba nasaun ne’e durante tinan 6 iha situasaun problema boot nia laran ne’ebe laiha solusaun relasiona ho terorismu. Golpe nudar solusaun, ne’e diak,” dehan Sawagogo.

Diretor Human Rights Watch ba Rejiaun Afrika Oeste, Corinne Dufka, hare katak golpe hatudu governasaun Prezidenti Kabore laiha kapasidade hodi rezolve problema iha nia nasaun.

“Golpe ho apoiu nia povu ne’e hatudu inkapasidade governu Kabore hodi rezolve problema korupsaun, governu, no protesaun sivil, ne’ebe lori mos situasaun grave ho ameasa grupu ekstremis sira,” dehan Dufka.

To’o Segunda, sedauk iha informasaun ba pozisaun Prezidenti Kabore nian. Veikulu tanki Guerra ne’ebe parte forsas Prezidenti nian kontinua besik ho residensia prezidenti nakonu ho kilat musan. Tanki Guerra ida nakonu ho ran barak.

Responde situasaun ne’e Ministeriu Estranjeiru Estadu Unidas Amerikanu husu parte militar atu liberta Prezidenti Kabore.

Iha parte seluk, Sekretariu Jeral Nasoens Unidas, Antonio Guterres kondena makas kualker esforsu hamonu governu ho uza kilat, inklui iha Burkina Faso. Nia husu ba lideransa golpe sira atu abaixa arma sira.

Burkina Faso sai nasaun foun iha Afrika Oeste ne’ebe akontese golpe militar hafoin Mali, Chad, no Guinea.