Laos deit iha Valor Kultural no Istoria, Tais iha Valor Ekonomia

DILI, www.thetimor-news.com –  Ministru Komersiu no Industria,  Nino Pereira hateten, Tais nu’udar identidade Timor-Leste nian, laos deit iha nia valor kultural no istoria, maibe iha mos valor ekonomia.

“Tais laos deit iha valor kultural no iha valor istoriku maibe, iha nia valor ekonomiku katak ne’e bele sai hanesan industria ida ne’ebe ita bele orienta para oinsa familia ou grupu soru Tais ne’ebe mak ejisti ona durante ida ne’e bele sai hanesan ondra de rejimentu ba foin sa’e sira ne’ebe mak iha espiritu emprendorismu ida ne’e sai mos hanesan dalan ida ba sira hodi aumenta sira nia kreatividade no vontade tomak para bele aumenta tan produsaun, bele hadia tan nia kualidade,” dehan Nino Pereira iha nia deskursu wainhira loke kompetisaun Soru Tais ba Foin Sa’e iha ambitu komemorasaun loron nasional Tais ba daruak ne’ebe realiza iha Centro Convençoes Dili (CCD), Sabadu (9/12/2023).

Atu sai ba valor ekonomia, governu iha ona planu oinsa atu kuidadu nafatin Tais nu’udar produtu eransa, produtu orijinal no produtu identidade, persiza iha nia marka rasik, tantu ba nia dezenu no tipu atu nune’e labele falsifika nia produtu.

“Ohin mos ami hare no rona informasaun husi ita nia maluk inan feton sira mak fa’an tais katak iha loja Xineja balun hahu fa’an mos tais, halo tais kopia sira ne’e, ne’ebe tau hela atensaun ba ida ne’e hodi toma medida ho asaun konkreta para ita bele prevene hahalok ne’ebe mak iresponsabilidade hodi kopia ka naok fila fali riku soin ne’ebe mak ita iha ka interese seluk hau hanoin parte MKI liu hosi Diresaun Nasional Industria nian sei hare no bele proteje ita nia produtu,” dehan Nino Pereira.

Membru governu ne’e hateten, kompetisaun soru tais ba foin sa’e ne’e nu’udar atividade ida hodi rezerva no konserva tais hanesan produtu kultural ne’ebe iha nia sustentabilidade.

“Ita orgullu tanba ohin ita bele hare foin sa’e sira lubuk ida, sira mos hola parte aktivu no matenek ne’ebe maka sira iha hodi kuidadu nafatin rikusoin kultural ne’ebe mak ita iha hodi prejerva proteje ba fali jerasaun sira ne’ebe maka tuir mai,” dehan Nino ba jornalista sira.

Komemorasaun loron Tais nasional ne’e atu hatudu ba jerasaun sira katak Timoroan hotu tenki kuidadu nia identidade hanesan nia riku soin kultural ne’ebe tenki kuidadu atu ema ou nasaun seluk kopia.

Rogerio dos Santos nu’udar Xefi Grupu Feto Buka Rasik Munisipiu Bobonaro sente orgullu bele reprezenta nia munisipiu ba kompete iha kompetisaun ne’e hodi hatudu sira nia kultura iha Tais ne’ebe sira soru.

“Hosi kompetisaun ne’e, laos ami hatudu deit ami nia kultura, maibe ami mos bele aprende fali kona ba kultura hosi munisipiu seluk,” dehan Rogerio.

Iha kompetisaun ne’e, Tais ne’ebe sira nia grupu soru maka ho naran Kedelen ho lian materna katak hanesan fitun ne’ebe mak lakan ho koris oi-oin.

“Tais Kedelen ne’e uza ba tempu sau batar no hanaran Kedelen ne’e ho koris oi-oin no barak,

Iha parte seluk, Kordenador Ministéiriu Komersiu no Industria, Antonio  da Costa informa, partisipante iha kompetisaun refere mai hosi munisipiu hotu no RAEOA ne’ebe kada manuisipiu reprezenta hosi grupu 2.