LIGA TIMORENSE 2026 I EMMANUEL FC 4 – 2 FC. CORAÇÃO

DILI, www.news-viptv.com – Lakon golu rua uluk kontra Fc. Coracao, Emmanuel FC konsege muda skoru sai 4-2 hodi hetan pontu 3 iha jogu dahuluk primeira divisaun epoka 2026 ne’ebe halao iha Estadiu Munisipal Dili, Domingu (24/5/2026).

Golu vitoria Emmanuel FC ne’e hatama husi nia Jogador estranjeiru Armando Beadound iha minutu 52 no 66, no Jhon Lawani iha minutu 80 no 90.

Entertantu golu  Coracao nian hatama husi Ofri Halitopo iha minutu 38 wainhira livre sem guarda husi Defeza adversariu iha atakasaun ne’ebe nia halo husi parte liman los nian.

Golu daruak Emmanuel nian halo husi Jeca Monteiro iha minutu 49 liu husi spectacular shoot ne’ebe labele blokeia husi baliza Emmanuel nian.

Lakon golu rua husi Coracao, la halo mental Jogador Emmanuel tuun, liu minutu tolu, Jogador estranjeiru Emmanuel, Armando Beadound ho kalma bele finaliza assist ne’ebe fo husi nia kolega, hodi sai golu.

Liu minutu 14, iha minutu 66, Armando halo tan golu daruak husi nia ain ne’ebe lori nia ekipa empata 2-2.

Jhon Lawani nudar mos Jogador estranjeiru iha Emmanuel FC, konsege mos oferese golu rua ne’ebe golu ida nia halo husi bola falta iha minutu 80, no golu ida seluk nia halo iha minutu 90.

Treinador Fc. Coracao Miro Baldo Bento hateten nudar treinador nia senti triste ho rezultadu jogu ne’ebe nia ekipa hetan derota, maski lidera uluk jogu ho 2-0.

Ho derrota ne’e, nia sei hadia diak liu tan parte frakeza nia ekipa atu nune’e bele preparadu hasoru Karketu Dili iha jogu tuir mai.

Gaspar Amaral nudar treinador Emmanuel FC hateten, vitoria ne’ebe nia Jogador hetan tamba konsege muda etsratejia iha Segunda parte, hafoin evalua ona jogu primera parte nian.