15-16 Dezembru, ALMAMOR Realiza Kongressu Nasional ba Da-hat

DILI, www.news-viptv.com – Assosiasaun Nasional de Musika Timor-Leste (ALMAMOR) desidi ona iha 15-17 Dezembru 2023 sei realiza sira nia kongressu nasional ba da-hat hodi hili sira nia estrutura foun.

Prezidenti Komisaun Organizadora ba Kongressu Nasional, Leopoldo Moniz informa fatin ba kongressu sei halao iha Kampus Universidade Catolica de Timor (UCT) Balide, Dili.

Iha kongressu nasional ne’e, hosi Sekretaria Estadu Arte no Kultura (SEAK) sei halo mos aprezentasaun ba loron dahuluk kona ba Kodigu Autor no Direto Konexu hodi regula no kontrola produtu autor nain sira nia produtu.

“Komisaun organizadora mos  agradese ba parte hotu-hotu nia apoiu  no suporta liu-liu ba Ministeriu Juventude, Desportu, Arte no Kultura liu hosi Sekretariu Estadu Arte no Kultura nia apoiu maximo 100 % ba iha Komisaun Organizadora ida ne’e, no la haluha agradese mos Mauhoka laran diak ne’ebe durante ne’e apoiu mos ba servisu hotu ne’ebe Komisaun Organizadora halao besik tinan ida, preparasaun sira ne’e hotu hetan tulun mos husi ita nia maluk sira hotu ne’ebe mak la konsege mensiona ida por ida,” dehan Leo Moniz ba jornalista sira iha konferensia imprensa, Tersa (12/12/2023), iha Bemori, Dili.

Iha fatin hanesan, Vise Prezidenti Komisaun Organizadora ba Kongressu Nasional, Paulinho Pacheco Magno husu ba maluk artista sira atu hola prezensa iha kongressu nasional ne’e tamba importante ba ALMAMOR ne’ebe sai mahon ba artista musika sira.

Nune’e mos Vise Sekretariu Juvi Batista esplika katak kongresista sira ne’ebe sei hola prezensa iha kongressu nasional ne’e maka artista hosi kantor, dansa, teatru, filme, fotografia, pintor no seluk-seluk tan, inklui maluk defisiente sira ne’ebe iha talentu mos iha area musika.

Orsamentu ne’ebe ALMAMOR hetan hodi realiza kongressu ne’e hetan apoiu hosi MJDAK-SEAK hamutuk ho osan US$ 20,000 no aumenta hosi setor privadu ne’ebe total fundus ne’ebe rekoilla liu US$ 30,000.