Lautem, WWW-NEWS-VIPTV.COM — Interkámbiu kulturál sai dalan importante ida atu hametin rekonsiliasaun, amizade no komprensaun mútua entre komunidade Timor-Leste no Indonézia, liuliu iha área fronteira. Primeiru-Ministru Timor-Leste, Kay Rala Xanana Gusmão, hato’o boas-vindas ba delegasaun no partisipante sira husi nasaun rua iha abertura Festivál Fronteira 2026, ne’ebé hala’o iha Suku Com, Munisípiu Lautém, Kinta (22/10) kalan.
Xanana Gusmão manifesta esperansa katak festivál ne’e bele sai oportunidade ba komunidade sira atu fahe esperiénsia kona-ba kultura no amizade, no hametin liután relasaun rekonsiliasaun entre povu Timor-Leste no Indonézia.
“Ha’u hein katak, durante loron tolu iha ne’e, ita bele fahe esperiénsia ba malu kona-ba ita-nia kultura no amizade, liuliu atu hametin liután relasaun rekonsiliasaun entre kultura ho kultura,” dehan PM Xanana.
Festivál Fronteira 2026 lori tema “Interkámbiu Kulturál ba Hametin Rekonsiliasaun”, ho subtema “Ha’u Nia Rai – Ha’u Nia Tasi – Ha’u Nia Kultura”.
Eventu ne’e la’ós de’it atu promove kultura tradisionál, maibé mós atu hametin relasaun entre komunidade fronteira, dezenvolve produtu lokál no kria oportunidade ekonómika ba populasaun sira.
Programa festivál nian inklui aprezentasaun arte no dansa tradisionál, expozisaun produtu lokál, no atividade sira kona-ba ekonomia azúl, peska sustentável, ekoturizmu no konservasaun rekursu tasi nian.
Partisipante sira mai husi komunidade no delegasaun Timor-Leste no Indonézia, inklui reprezentante husi Provínsia Nusa Tenggara Timur (NTT), hanesan Kabupaten Belu, Kabupaten Timor Tengah Utara (TTU) no Kabupaten Kupang. Grupu kultura Sanggar Sandalwood mós partisipa hodi reprezenta kultura husi TTU, hamutuk ho reprezentante sira seluk husi Maluku, Kalimantan, illa Kisar no Wetar.
Festivál Fronteira 2026 hala’o hosi 23 to’o 25 Outubru 2026, iha Suku Com, Postu Administrativu Lautém, Munisípiu Lautém.
Festivál Fronteira ne’e mak programa anual ida hosi Ministériu Juventude, Desportu, Arte no Kultura (MJDAK), ne’ebé implementa liuhosi Sekretaria Estadu Arte no Kultura (SEAK). Programa ne’e hahú ona iha tinan 2023 ho objetivu atu promove no valoriza kultura tradisionál, hametin identidade kulturál, no haburas amizade no kooperasaun entre komunidade sira iha área fronteira Timor-Leste no Indonézia.
Ba tinan 2026 ne’eOrganizasaun eventu ne’e kontinua envolve Centro Nacional Chega! (CNC), Ministériu Administrasaun Estatál (MAE), Gabinete Fronteira Terrestre no Marítima no Autoridade Munisipál Lautém.
Hosi nia implementasaun, Festivál Fronteira sai espasu ba komunidade sira husi nasaun rua atu fahe kultura, arte, tradisaun no esperiénsia ba malu. Liuhosi atividade kulturál no partisipasaun komunidade nian, programa anual ne’e mós buka kontribui ba hametin rekonsiliasaun, komprensaun mútua no kooperasaun transfronteirisa entre Timor-Leste no Indonézia.
Liuhosi interkámbiu kulturál no partisipasaun komunidade sira, festivál ne’e espera bele kontribui ba hametin dame, rekonsiliasaun no kooperasaun transfronteirisa entre Timor-Leste no Indonézia.
