Demisaun Hosi Estadu Clerical, Amu Martinho Gusmão Hein Dezisaun Santo Padre

DILI, news-viptv.com – Hafoin hetan ona karta suspensaun hosi Bispo Diocese Baucau, D. Basilio do Nascimento hosi nia knar amu lulik, Padre Martinho Germano da Silva Gusmão sei hein tan dezisaun ikus hosi Santo Padre ba nia estadu clerical.

Iha 30 Agostu 2021, Bispu Diocese Baucau, D. Basilio do Nascimento publika ona karta offisial ba Amu Martinho Gusmão ba nia suspensaun hosi nia atividade hotu iha uma kreda.

Karta Amu Martinho Gusmão hatama iha 25 Janieiru 2020,ba nia Bispo Diocessano hodi husu renunsia ba nia Ministeriu Sacerdotal katak hapara nia kna’ar nudar amu lulik.

“Ho biban ida ne’e, Bispo Diocese Baucau nia hakarak mai fo hatene ba membro hot-hotu Kreda Catolica iha Timor-Leste katak, durante tempu naruk ida nebe P. Martinho Germano da Silva Gusmão questiona, reflecte, rona, reza no deside kona ba nia vida no nia knar nudar Nai Lulik Kreda Catolica nian, ho conciensia limpa no serena,” esplika D. Basilio do Nascimento iha nia karta suspensaun ne’e.

Bispu Diocese Baucau ne’e mos esplika, iha 4 Fevereiru 2021, Amu Martinho Gusmão haruka surat id aba Santo Padre hodi husu nia demisaun ba nia estadu clerical, katak husu atu la moris ona tuir estatutu Nai Lulik nian.

“Nune’e hatan ba Rev. P Martinho Germano da Silva Gusmão nia vontade no dezisaun, wainhira prosesu kanoniko sei lao hela, hau nudar Bispo Diocese Baucau nian dekreta Suspensaun Ministeriu Sacerdotal katak hahu 20 Agostu 2021 ba oin hapara ona nia atividade sira hotu nebe sakramentu ordem haraik ba nia atu halao iha uma kreda,” D. Basilio do Nascimento hakerek iha karta ne’e.      

Demisaun Rev. Amu Martinho Gusmão ne’e viral kedan iha media sosial no hetan komentariu oioin, inklui komentariu balun dehan katak Amu Martinho Gusmão sei kandidata ba Prezidenti Republika periode 2022-2027.

Durante ne’e Rev. Amu Martinho Gusmão konesidu nudar amu lulik ida ne’ebe sempre hato’o kritika makas ba ukun nain ba dezisaun governu no estadu ne’ebe la benefisia ba povu.

Dala barak politikus sira koalia lia makas hasoru Rev. Amu Martinho Gusmão hodi husu ba nia husik batina mutin (sai hodi padre) hodi halo politika.