Bankada FRETILIN Konsidera Deklarasaun Bankada CNRT Koko Atu Subar no Desvia Husi Realidade

DILI, www.news-viptv.com – Hatan ba deklarasaun politika Bankada CNRT nian ne’ebe apresia no louva ba prestasaun servisu Nono Governu Konstitusional ba tinan ida nian, Bankada FRETILIN konsidera deklarasaun politik ne’ebe deklara iha plenaria Parlamentu Nasional, Tersa (9/7/2024), konsidera atu koko subar no desvia husi realidade moris nian.

“Ohin ita rona declaração no intervenção hosi Bancada CNRT ne’ebe, infelizmente, nakonu ho falta transparensia, informasaun lalos no tentativa atu subar hosi realidade no desvia atensaun hosi má jestaun atual iha area governativas sira hotu, inklui iha area Saude, Edukasaun no Ekonomia,” deklara Deputada Nurima Ribeiro, hodi kontinua hateten, ”Balu dehan ami mak stress, mas ami hare mak sira mak stress karik ne’e mak halo esforsu bo’ot atu subar no desvia hosi realidade, ignora no halo trosa ho povu nia moris no difikuldade sira ne’ebe povu hasoru.”

FRETILIN la konkorda ho CNRT nian deklarasaun ne’ebe dehan ekonomia komesa diak, maibe realidade maka dezemprego aumenta, inflasaun bo’ot ba beibeik no afeta poder de compra hosi sidadaun sira, investimentu estranjeiru ne’ebe seriu no sustentavel laiha.

“Ita labele taka matan ba faktus reais no ba difikuldades ne’ebe ita hasoru hela.

Governu subar nia falha liu hosi retorika katak hamos erros hosi governu anterior. Mas realidade mak hapara programas no contratos bazeia deit ba vinganca no arrogansia politika tamba deit hosi governu anterior, mesmo que programa sira iha benefisiu ba povu. Ida nee akontese tamba iha pratika povu la sai sentru ba governasaun IX governu ne’ebe lidera hosi Primeiru Ministru Xanana Gusmão,” dehan Nurima Alkatiri.

FRETILIN hare katak, dadauk ne’e korupsaun buras ba beibeik, tamba ema hotu testemunha hela asaun no burocracia sira neebe aumenta no loke dalan ba korupsaun no nepotismu buras ba beibeik, no ikus sidadaun sira mak sai afetadu liu tan.

“Sidadaun Timor-Leste hasoru difikuldade bo’ot liu tan ba servisu basiku no direitu fundamenta ba asesu servisu saude no edukasaun, tamba má jestaun hosi governantes relevantes, ne’ebes ikus rezulta iha interupsaun no inefikasia iha setor rua ne’e. Governu no Bankada Governu koko dala barak ona atu desvia atensaun hosi má jestaun, ho alegasaun katak informasaun no dados ne’ebe ami lori mai nudar falsu no politizada. Maibe, bainhira koko atu ignora ka minimiza problema real ne’ebe povu hasoru, hatudu falta sensibilidade no vontade atu servi povu ho lolos,” nia dehan.

Iha deklarasaun Bancada FRETILIN ohin nian, Nurima Alkatiri bolu atensaun fila fali ba situasaun kolapsu sistema saude nasional nian, ne’ebe inklui falta aimoruk, partidarizasaun prosesu rekrutamentu no insidensia mortalidade aas iha Hospital Nasional.

Bankada PLP no Khunto mos levanta asuntu ida ne’e beibeik, no horseik rona Bankada PD, ne’ebe halo parte governu mos, ho korajem hatudu maturidade no responsabilidade politika hodi hato’o konaba situasaun grave ne’ebe ita nia sistema saude publika hasoru dadaun no afeta ita nia populasaun iha teritoriu tomak.

“Nune’e, atu ajuda ita iha forum ida ne’e para labele fo’o kulpa ba malu deit, ami Deputado nain 24 hatama ona requerimentu ba Mesa Parlamento atu kria komisaun ida ba Inqueritu parlamentar atu hare ba asuntu refere. Ho dalan ida ne’e mak ita hotu, hamutuk, bele sai esklaresidu ho dados no faktus reais, no bele ajuda ita nia rai doben atu sai hosi situasaun krize ida ne’e, hodi ita nia povu bele iha konfiansa fila fali iha instituisaun Estadu,” dehan deputada ne’e.