Bankada FRETILIN Husu Manifestante Labele Halo Asaun ho Violensia

Dili, www.news-viptv.com – Bankada FRETILIN iha Parlamentu Nasional husu ba manifestante sira ne’ebe maioria jovem no estudante hodi labele halo asaun ho violensia

Bankada FRETILIN hato’o lia hirak ne’e liu husi Deputada Nurima Alkatiri iha konferensia imprensa relasiona ho pozisaun Bankada FRETILIN ne’ebe desde inisiu iha apresentasaun Orsamentu Jeral Estadu atu elimina osan sosa kareta ba deputadu sira hodi aloka ba assuntu saude nian.

“Jovem no estudante sira bele hato’o sira nia hanoin, sira nia aspirasaun. Ita labele aproveita situasaun ida ne’e atu halo violensia. Husu nafatin atu halo demonstrasaun pasifiku, husu mos autoridade sira atu kontrola situasaun ho kalma labele responde violensia ba manifestante sira atu ita hotu bele moris hotu iha harmonia nia laran, maibe ita labele ignora kritika konstrutivu ba ita nia nasaun,” dehan Nurima Alkatiri ba jornalista sira, Tersa (16/9/2025), iha Edifisiu Bankada FRETILIN iha Parlamentu Nasional, Dili.

FRETILIN, esplika deputada Nurima, kongratula asaun manifestasaun ne’ebe hatudu husi estudante, jovem no movimentu sosiais sira hodi husu kansela sosa kareta ba deputadu Parlamentu Nasional sira.

“Bankada FRETILIN hakarak kongratula estudante universitariu no movimentu sosiais sira hotu ne’ebe halo manifestasaun ejiji kansela hola kareta ba deputadu sira,” dehan oan feto husi Sekretariu Jeral Partidu FRETILIN, Mari Alkatiri ne’e.

PNTL iha asaun manifestasaun loron daruak bandu ona manifestante sira atu halo manifestasaun iha Parlamentu Nasional nia oin no autoriza deit iha area Kampus UNTL laran no kruzamentu Muzeu Resistensia nia oin. Maibe, manifestante sira la konkorda hodi sobu barikade no sunu roda balun hodi rezulta PNTL foti asaun tiru gás lakrimojéniu.

Iha Kampu Tenis Liceu nia oin, oknum manifestante sira konsege sunu kareta governu ida.