Governu Prevee Miliaun USD 47,9 ba Reabilitasaun Estrada Lourba-Atsabe no Letefoho

DILI, www.news-viptv.com – Governu liu husi sorumutu Konsellu Ministru iha Kuarta (30/7/2025) aprova ona osan miliaun USD 47,9 ba projetu reabilitasaun Estrada nasional iha seksaun entre kruzamentu Lourba (Bobonaru), Atsabe no kruzamentu Letefoho (Ermera), ho naruk 48,93 km.

Alende ne’e, Konsellu Ministru tuir projetu sira ne’ebé aprezenta hosi Ministru Obras Públikas, Samuel Marçal, Konsellu Ministrus delibera mos atu autoriza despeza no abertura ba ninia prosedimentus aprovizionamentu hodi halo ezekusaun ba projetu reabilitasaun infraestruturas rodoviárias tolu seluk iha seksaun entre Maliana, Kailaku no Ponte Marobo (Munisípiu Bobonaru), ho naruk 26 km no kustu ne’ebé prevee millaun USD 25,6.

Nune’e mos ba reabilitasaun estrada munisipál, iha seksaun entre kruzamentu Bobonaru no Lolotoe Vila, ho naruk 8,9 km no kustu ne’ebé prevee millaun USD 13,8.

Entertantu reabilitasaun ba estrada urbana Likisá, ho naruk 20 km no kustu ne’ebé prevee millaun USD 19,8.

Governu mós fó instrusaun ba Komisaun Nasionál Aprovizionamentu hodi hahú etapa sira tuir mai hosi prosedimentus kontratasaun públika nian, tuir lejizlasaun ne’ebé vigora.