PNTL No PCIC Dezenvolve Kapasidade Téknika Iha Investigasaun Kriminál Dijitál

Dili,WWW.NEWS-VIPTV  — Polísia Nasionál Timor-Leste (PNTL) no Polícia Científica de Investigação Criminal (PCIC) kontinua hametin kapasidade téknika membru sira nian iha investigasaun kriminál dijitál, ho formandu na’in-10 remata treinamentu Laboratóriu Forense Dijitál no simu sertifikadu iha serimónia enseramentu ne’ebé hala’o iha edifísiu Timor-Leste Police Development Program (TLPDP), Hudi Laran, Dili.

Sertifikadu sira ne’e entrega husi Komandante Komandu Operasaun PNTL, Komisáriu Asistente Polísia Armando Monteiro, hamutuk ho parseiru TLPDP, ne’ebé lidera husi Darren Boy.

Formandu na’in-10 ne’e kompostu husi membru PNTL na’in-lima, husi Direção Servisu Investigasaun Kriminál (DSIK), no membru PCIC na’in-lima.

Treinamentu ne’e fasilita husi TLPDP ho objetivu atu hasa’e koñesimentu tékniku no dezenvolve kapasidade profisionál partisipante sira nian iha área forense dijitál, liuliu iha identifikasaun, rekolla, análize no ezaminasaun evidénsia dijitál ne’ebé importante ba prosesu investigasaun kriminál.

Liu husi formasaun ne’e, membru sira hetan koñesimentu no abilidade atu aplika prosedimentu no padraun profisionál iha jestaun evidénsia dijitál, hodi suporta investigasaun kriminál ne’ebé kredível no bazeia ba evidénsia.

Partisipasaun iha treinamentu ne’e mós reprezenta esforsu atu hametin kooperasaun entre PNTL, PCIC no TLPDP iha dezenvolvimentu rekursu umanu no hadi’a kualidade servisu investigasaun iha Timor-Leste.

Ho kapasidade téknika ne’ebé dezenvolve liuhusi treinamentu ne’e, espera katak membru sira bele kontribui ba prosesu investigasaun ne’ebé profisionál, efetivu no preparadu atu responde ba dezafiu kriminál iha era dijitál.

Komandu PNTL kontinua fó importánsia ba formasaun no kooperasaun ho parseiru sira atu hametin kapasidade institusionál no hadi’a servisu polísia iha Timor-Leste.