Jesus Mai Atu Muda Ita Nia Istoria

Dili, www.news-viptv.com – Jesus mai atu muda ita nia istoria sai topiku ba selebrasaun Natal sarani sira iha Igreja Bethel Timor-Leste Reinu Bethany ne´ebe halao iha Sexta (16/12/2022) iha Bidau Akardiruhun, Dili.

Pregasaun selebrasaun Natal refere prega hosi Pastor Henk Karelse hosi Holanda.

Ho selebrasaun Natal ne´e, Pastor Henk Karelse hateten, Jesus Kristu mai iha mundu hodi sai salvasaun ema hotu atu hamoos hosi pekadu mundu nian. Tamba ne´e salvasaun akontese liu hosi Nai Jesus deit, laiha tan dalan seluk.

“Jesus mai hodi muda istoria mundu nian, nune´e mos ba ita, Jesus mai atu muda ita nia istoria,” dehan Ps. Henk Karelse.

Maromak Atan hosi Holanda ne´e esplika, Jesus mai laos atu haruka ema tuir relijiaun ida, tuir igreja ida tamba iha Lalehan laiha naran relijiaun ou igreja ida. “Iha Lalehan laiha naran igreja, so iha livru moris. Jesus mai atu ita tuir Nia Lia Fuan Santo.”

“Buka uluk Maromak nia reinu no Nia lia loos, no Nia sei aumenta buat seluk hotu ba imi,” Ps. Henk Karelse haklaken tuir evanjellu Mateus 6:33.

Iha selebrasaun Natal ne´e mos hetan prezensa hosi Embaixador Republika Indonesia mai Timor-Leste Octo Manik ho nia espousa. Iha nia lia fuan badak hato´o boas festa Natal ba sarani Igreja sira no mos ba Timor-Leste hotu.

“Lori naran embaixador Indonesia hato´o fo boas festa Natal ba ita hotu no Maromak fo Bensa,” hateten Embaixador Octo Manik.

Nia hatutan, “Hanoin fali musika uluk hau sei kiik no kanta iha eskola dominikal Jesus hadomi ema hotu iha nasaun hotu, hau fiar mos Jesus hadomi Timor-Leste”.

Ho labarik no foin sa´e sira Timor-Leste, nia fiar katak Jesus sei uza foin sa´e sira hodi sai embaixador Kristu hodi haklaken Maromak Nia Lia Fuan Santo.

“Embaixador ne´e kargu kiik, maibe Maromak sei uza imi sai Embaixador Kristu hodi haklaken Maromak nia Reinu Lalehan,” embaixador ne´e profetiza.

Nuudar lideransa maximu Igreja Bethany nian, Pastor Johanes Angkie sente kontente bele selebra Natal ho nia sarani no hetan prezensa Pastor Henk Karelse ne´ebe mai do´ok hosi Holanda.

“Kalan ida ne´e ita hotu hetan bensaun Maromak nian, ita hetan naroman Nai Jesus nian iha selebrasaun Natal hamutuk ne´e, tamba liu hosi Natal Nai Jesus kontinua hakarak muda ita nia istoria moris. Maromak nia domin sulin nafatin hosi Lalehan ba ita hotu atu kontinua konese nafatin Jesus Kristu nudar ita nia salvador, so naran Jesus deit, laiha tan naran seluk ne´ebe bele salva ita hosi pekadu. Jesus laos deit liberta ita hosi pekadu no fo moris rohan laek ba ita hotu, halleluyah, Amen,” dehan Pastor Ankie.

Maromak atan ne´e mos husu ba sarani hotu atu kontinua orasaun atu domin no dame nafatin buras iha Timor-Leste no nakonu ho Maromak nia Gloria.