DILI, www.news-viptv.com – Governu iha nia politika rekoperasaun ekonomia hafoin pandemia COVID-19, kontinua enkoraja jovem sira atu involve iha rekoperasaun ne´e hodi kria negosiu kreativu.
Iha Seminariu ne´ebe organiza hosi Movimentu Estudante Cristão Timor-Leste (MEC-TL), Vise Ministru Turismu, Komersiu no Industria, Domingos Lopes Antunes esplika iha politika rekoperasaun ekonomia, governu iha mos programa kreditu suave hodi finansia empreza sira ne´ebe maka laiha finanseiru atu finansia sira nia kompana ne´ebe taxa de jurus ba kreditu suave ne´e ho deit 3% kada tinan.

Kreditu Suave ne´e, esplika Vise Ministru, inklui mos ba MEC-TL bele hetan liu hosi kriasaun koperativa ou empreza ne´ebe harii hosi movimentu nian.
Tamba ne´e, ho programa governu nian ba rekoperasaun ekonomia, Vise Ministru husu ba partisipante seminariu ne´e atu matenek no fihir saida maka bele halo wainhira asesu kreditu suave.
“Jovem labele hanoin servisu deit iha governu, ho programa ne´ebe governu iha bele hanoin halo buat ruma, produz hahan ga, hakiak animal, no setor seluk ne´ebe ema sedauk halo. Labele hanoin det maka hadau malu projetu governu nian,” dehan Domingos Antunes, Sabadu (22/10/2022), iha Salaun Igreja Hosana, Dili.
Kreditu suave nudar programa rekoperasaun ekonomia ida govenru nian hodi tulun setor privadu sira ne´ebe sofre tamba pandemia COVID-19. Iha rekoperasaun ekonomia, laos deit fasilita kreditu suave, governu mos fo subsidiu oi-oin ba setor privadu sira, inklui subsidiu ba uma kain sira no sesta bazika.
Prezidenti MEC-TL, Jose Pinto esplika, seminariu ne´ebe sira halo atu kapasita membru sira iha area ekonomia no jender, liliu hetan konesementu oinsa bele involve iha programa rekoperasaun ekonomia governu nian.
“Movimentu ida ne´e nia objetivu realiza seminariu ida ne´e maka oinsa kapasita jovem sira oinsa bele rekopera ekonomia iha vida moris, no ba feto sira oinsa bele kapasita an atu bele sai lideransa mos iha nasaun ne´e,” dehan Jose Pinto.
Octadoria Pua Remi nudar partisipante sente kontenti tamba bele hetan informasaun barak ne´ebe partilla hosi Vise Ministru Turismu, Komersiu no Industria, liliu oinsa bele asesu kreditu suave.
“Pessoalmente hau hare seminariu nee importante, hau persiza duni hatene oinsa rekoperasaun ekonomia iha ita nia rai no sistema oinsa maka governu halo. No hosi seminariu ne´e hau aprende oinsa bele asesu kreditu suave,” dehan Octadoria.
Ho seminariu ne´e, Jesuino D. da Costa Ximenes nudar komisaun organizadora espera bele mos sai autor ba atividade rekoperasaun ekonomi anian hodi dezenvolve ekonomia iha Timor-Leste.