Promove Tais Nu’udar Identidade, Governu Komemora Loron Nasional Tais

Dili, www.news-viptv.com – Hodi promove Tais nudar identidade kultura Timor-Leste nian ne’ebe hetan ona rekonesementu internasional hosi UNESCO, Governu komemora loron nasional Tais ba daruak ne’ebe realiza hosi 9 to’o 14 Dezembru 2023, iha Centro Convencōes de Dili (CCD).

Abertura komemorasaun Loron Nasional Tais ba daruak ho tema Haburas Tais ba Hau Rain loke dereta hosi Xefi Gabinete Sekretaria Estadu Arte no Kultura, Francisco Tae Mau hateten komemorasaun ne’e realiza ho objetivu hasa’e koñesimentu, divulgasaun no uzu Tais nian ba ema hotu, iha territóriu Timor-Leste, no Motiva Timor-Oan hotu-hotu, atu promove Tais.

“Tais hanesan identidade nasional ida iha ita nia rain Timor-Leste, hanesan Timor-oan ida hau orgullu no agradese ba UNESCO bele sertifika ona ita nia tais hanesan ita nia identidade,” dehan Francisco Tae Mau.

SEAK, nia esplika, konkorda katak Timor-oan hotu tenki hamutuk kuidadu no salva Tais nudar identidade Timor-oan atu parte seluk labele kopia hodi imprimi la tuir ona orijinalidade nian.

“Iha fatin balun halo ona kopia ba tais i pior liu sira Imprimi la tuir ona orijinalidadi Tais Timor-Leste nian ne’ebe mak iha no ida ne’e ita tenke kombate, sei ita hirak ne’e mak la hamutuk hodi kombate ida ne’e ita nia maluk sira ne’e sei uza oportunidade ida ne’e hodi modifika ita nia tais orijinal ne’ebe mak iha sai hotu ba tais imprimi, depois ita nia inan feton sira ne’ebe kria grupu iha fatin-fatin no tais hirak ne’e sei la iha valor,” dehan Francisco Tae Mau.

Ho komemorasaun ne’e, husu ba inan feton sira atu nafatin aproveta atividade sira durante loron 5 nia laran, inklui kompetisaun soru Tais.

Vise Prezidente Komisaun Nasional Patrimoniu Kultural no Material Timor-Leste, Francisca de Sousa hateten, nu’udar nain ba Tais, Governu iha responsabilidade no obrigasaun atu proteze no promove ba prezerva nudar indentidade Timor nian.

“Tanba ne’e mai ita hotu hadomi ita nia Tais no uza ita nia Tais rasik iha ita nia rain hodi hatudu ba mundu tomak katak Tais mak hau nia identidade ne’ebe diferente ho nasaun seluk,” dehan Francisca.

Iha fatin hanesan, Xefe Gabinete Ministru Komersiu no Industria, Julito Soares husu ba joven sira nafatin promove Tais nu’udar kultura no identidade nasaun Timor-Leste nian.

Atividade ne’e, prense mos programa lubuk ida hanesan, kompetisaun ba soru tais, ba inan soru nain sira, kompostu husi Munisipiu 12, inklui Raeoa, Poezia ba Joven foin sae sira, kompetisaun dansa Kultura, Sertame Tais, Workshop, Seminariu Tais/Talk show, marsa saudável uza atributu kultura nian no seluk tan. Aleinde ne’e, iha mos, feira ba sasan tradisional kultura nian, ne’ebé sei loke durante loron lima.