Kazu Portugal, Lider 77 no PSHT Husu Membru Hakmatek no Lamonu ba Provokasaun

DILI, www.news-viptv.com – Lideransa Organizasaun Arte Rituais sete-sete apela ba nia membru sira atu lamonu ba provokasaun relasiona ho kazu ne’ebe akontese iha Fatima, Portugal hodi hamate membru sete-sete.

Apela ne’e João Baptista “Sai la Fila” nu’udar Porta Vos 77 hato’o iha inkontru ne’ebe realiza husi KRAM ho mos lideransa PSHT, Sexta (7/6/2024), iha edifisiu KRAM, Lecidere Dili.

Sai la fila hateten, ba kazu ne’e organizasaun ritual sete-sete entrega prosesu tomak ba parte judisiariu, liliu ba autoridade seguransa Portugal tamba akontesementu ne’e iha rai neba.

Nune’e mos Vise-Presidente PSHT, Manuel Smith hato ho akontesementu ne’e hamonu duni dignidade estadu no hafoer naran Timor-Leste iha mundu internasional no nu’udar lideransa iha organizasaun arte-marsiais, pronto kolabora ho estadu, inklui simu kualker dezisaun governu nian relasiona ho kazu refere.

Kona ba mate isin, Presidente KRAM Octavio da Conceição hateten parte governu sei hein prosesu judisiariu hotu inklui autopsia antes lori mate isin vitima mai Timor-Leste.