Jesuino Matos Prezidenti Foun APC

Dili, www.news-viptv.com – Konsellu Ministru iha sorumutuk 10 Jullu 2024, nomea ona Jesuíno dos Reis Matos Carvalho ba kargu Prezidente Autoridade Protesaun Sivíl (APC, sigla portugues).

“Konsellu Ministrus aprova mós projetu Rezolusaun Governu, ne’ebé aprezenta husi Ministru Interiór, Francisco da Costa Guterres, hodi nomea Jesuíno dos Reis Matos Carvalho ba kargu Prezidente Autoridade Protesaun Sivíl, ba períodu tinan tolu, tanba formasaun, koñesimentu, kapasidade téknika no esperiénsia ne’ebé nia hetan hodi hala’o funsaun ne’e,” sira komunikadu imprensa ne’ebe publika iha portal official governu nian.

Ho nomeasaun ne’e eis Konsuladu Jeral Timor-Leste nian iha Kupaun, NTT, Indonesia ne’e sei troka pozisaun Superintendenti Polisia Ismael da Costa Babo ne’ebe asumi desde tinan 2022.

Tuir Lei Seguransa Nasional No 2/2010, APC nu’udar pilar terseiru hafoin F-FDTL no PNTL. Protesaun Sivíl mai ho papél fundamentál/importante iha prevensaun ho resposta ba situasaun asidente, katástrofe ka kalamidade ne’ebé mai husi ita ema nia hahalok ka natureza nian, hare’e husi nia gravidade determina oinsa ita hala’o asaun lalais hodi salva populasaun iha perigu nia laran no fó fila-fali situasaun normál moris nian ne’ebé aféta husi situasaun dezastre sira ne’e iha tempu badak nia laran.

Tuir prinsípiu sira ne’ebé hatur ona iha Lei Seguránsa Nasionál nian, diploma ida ne’e sei hari’I kuadru jurídiku jerál ne’ebé presiza hodi regula atividade ne’ebé atu hala’o hodi prevene no responde ba situasaun sira ne’e hodi hari’i estrutura ezekutiva sira ne’ebé lós, operasionál sira, konsultiva sira nomós koordenasaun hodi hala’o maske sei regula liuhusi diploma governu nian rasik.

Relevante tebes órgaun sira ho servisu ne’ebé sei kompoen sistema ba sokorru ho Protesaun Sivíl, ne’ebé ita hakarak mós integradu ne’ebé sei kofirma husi kna’ar ka funsaun sira ne’ebé fó ba sira iha planu seguránsa interna nian, ho ba ajente protesaun sivíl nian, maske atu hanesan kompeténsia prinsipál ka kompeténsia subsidiária artikulada ka hamutuk ho forsa defeza ho seguránsa tuir lei haruka.