APC husu Publiku labele Paniku wainhira rona Sirene Alerta Sedu ba Tsunami

Dili, www.news-viptv.com  – Autoridade Proteção Civil (APC) husu ba publiku sira, liliu komunidade iha Kapital Dili atu labele paniku wainhira APC halo teste ba alarma alerta sedu ba Tsunami ne´ebe sei realiza iha Sexta (24/2/2023), tuku 15.00 OTL.

Diretór Gabinete Relasaun External no Komunikasaun, Anacleto Caetano apela ba komunidade iha Kapital Dili, liliu komunidae ne´ebe hela besik sistema ne´e APC monta iha fatin rua Bidau Lecidere no area Aeroporto Internasional Nicolao Lobato atu labele paniku.

“Husu ba komunidade sira, liliu hela iha area tasi ibun ne´ebe besik ho sistema alerta sedu ne´e parte Bidau Lecidere no aeroporto nian iha Sexta oras tuku 3 lokoraik Autoridade Protesaun Sivíl sei teste ka koko Tsunami Sirene nia lian, nune’e komunidade sira ne’ebe hela besik iha area rua ne’e waihira rona Tsunami Sirene nia lian labele paniku,” informa Anacleto Caetano iha konferensia imprensa, Kuarta (22/2/2023) iha edifisiu APC Caicoli, Dili.

Diretor ne´eesplika katak sistema alerta ne´e hadia ona hosi Kompania ARFAT ne’ebé sei halo teste hafoin sistema ne´ela funsiona durante tinan 3.

Importate husi teste ne’e atu garante funsionamentu ba Tsunami sirene ne’ebe dadauk ne’e kompania ARFAT halo hela mantensaun, atu finaliza mantensaun refere kompania presija koko atu rona lian antes entrega ba agensia ka Autoridade Protesaun Sivíl hanesan nain ba projeito ka apareilho refere, nafatin husu ba Publiku karik test Tsunami Sirene ne’e lian tur hakmatek labele Paniku.