Hetan Manifestasaun, Partidu 3 iha PN Aseita Kansela Sosa Kareta ba Deputadu

Dili, www.news-viptv.com – Rekonese sosa kareta foun ba deputadu sira la reprezenta preokupasaun publiku nian, partidu politiku 3 iha Parlamentu Nasional aseita kansela sosa kareta.

Liu husi konferensia imprensa, Segunda (15/9/2025) iha Parlamentu Nasional, Partidu 3 ne’ebe husu atu Parlamentu Nasional kansela sosa kareta ne’e maka Partidu CNRT, PD no KHUNTO. Entertantu FRETILIN no PLP hili nonok.

Vise Xefi Bankada CNRT, Patrocinio Fernandes hateten, tetú ba situasaun sira hotu, Bancada tolu refere halo análize ba polémika sosa kareta, nomós hare katak própriu deputados balun direta no indireta esplora situasaun ne’e nu’udar aproveitamentu ida ba sira nia interese politika partidária no grupo nian hodi instrumentaliza tiha emosaun públiku hodi halo instabilidade, desidi kansela dezisaun ba sosa kareta.

Iha fatin hanesan, Bankada FRETILIN apresia ba estudante Universitariu sira ne’ebe halo manifestasaun hodi husu PN kansela sosa karreta.

Nune’e mos Bankada PLP, hateten, Inísiu Kedas Vota Kontra sosa Karreta 65 ba Deputadu sira hosi Orsamentu 2025, no karik karreta ne’e mai Bankada PLP sei rejeita simu karreta refere.

Iha sesaun solene abertura terseira Sesaun Lezislativa hosi Lezilatura VI Parlamentu Nasional, ne’ebe hetan prezensa husi Prezidenti Republika Jose Ramos-Horta, estudante rihun ba rihun halo manifestasaun iha uma parlamentu nasional oin hodi hato’o sira nia lamentasaun ba sosa kareta deputadu sira nian ne’ebe gastu osan barak no la merese iha situasaun povu sei hasoru problema sosial oi-oin, no moris iha mukit nia laran.

Maski manas iha minutu balun nia laran hafoin polisia tiru gás lakrimojéniu tamba massa hahu tuda malu, autoridade polisia kontinua fo lisensa ba estudante sira hodi hato’o sira nia ejijensia sem violensia.