Konsellu Ministru Aprova Dekretu Lei ba Kriasaun BNDTL

DILI, www.news-viptv.com – Konsellu Ministru iha sorumutuk Kuarta (30/7/2025) aprova projetu Dekretu-Lei ne’ebé kria Banku Nasionál Dezenvolvimentu Timor-Leste, SA (BNDTL), ne’ebé aprezenta hamutuk hosi Gabinetes Ministrus Planeamentu no Planeamentu Estratéjiku, Ministra Finansas no Vise-Primeiru Ministru no Ministru Koordenadór Asuntus Ekonómikus.

Iha Komunikadu imprensa governu nian, esplika, BNDTL hanesan instituisaun finanseira ida ho kapitál públikus ne’ebé esklusivu, ho personalidade jurídika no autonomia administrativa, finanseira no patrimoniál, ne’ebé nia objetivu atu apoia investimentu produtivu no hasa’e kreximentu ekonómiku sustentavel país nian.

Tuir diploma ne’ebé daudaun ne’e aprova, BNDTL iha misaun atu kompleta falla merkadu nian iha asesu ba finansiamentu médiu no tempu naruk, promove solusaun adekuada ba nesesidade komunidade emprezariál timoroan, liuliu iha setór ne’ebé konsidera estratéjiku, hanesan agrikultura, indústria transformadora, turizmu, infraesruturas no servisu sosiál sira.

Banku ne’e bele mós hala’o funsaun iha jestaun fundus estratéjikus, tuir mandatu Governu nian, nune’e asegura ninia sustentabilidade iha futuru no neutralidade orsamentál.

Diploma ne’e estabelese mós katak kapitál sosiál inisiál ne’ebé fiksa iha dolar amerikanu millaun 30, ne’ebé Estadu maka subskreve tomak.

Dadauk ne’e Governu iha mos nia banku ida ne’ebe operasionaliza ona maka Banco Nacional de Comércio de Timor-Leste (BNCTL).