Membru UEP Nian 6 Termina Treinamentu ba AMU

DILI, www.news-viptv.com  –  Membru Polisia Nasional Timor-Leste (PNTL) husi Unidadxe Espesial Polisia (UEP) nain 6 termina sira nia kursu ba programa treinamentu kona ba Asaun Mina Umanitaria (AMU) durante fulan ida nia laran ne’ebe oferese husi parseiru Forsa Naval husi Estadus Unidus Amerika (USA).

Reprezentante Komandante Jerál PNTL aktual Komandante Komandu Administrasaun Superintendente Xefe Polísia Natersia Eufrasia Soares Martins ba jornalista sira hateten, programa AMU ne’e hare’e liu kona-ba oinsa maka atuasaun EOD nian wainhira detekta iha sasan explozivu ne’ebe husik hela iha funu sira ne’ebe liu ona.

“Formasaun ka treinamentu ne’e sira halo ona, sira mós hetan Teoria lubuk ida no mós iha prátika ba iha ekipamentus foun balun ne’ebe oferese husi Korpu Marínha USA nian rasik hodi atende ka halo eliminasaun ba iha bomba restu explozivu hanesan ohin mensiona,” dehan Superintendente Xefi Polisia Natersia Martins, Kuarta (30/7/2025), iha Kuartel UEP Bairo Pite, Dili.

Komandante Polisia ne’e esplika, membru UEP nain 6 ne’e antes partisipa ona iha treinamentu nível báziku husi parseiru Japão, ne’ebe sira sei kontinua halo servisu ida ne’e to’o ohin loron sira hetan ona Formasaun ba Nível Primeiru, Segundu no Terseiru.

Reprezentante Embaixador USA iha Timor-Leste aktual Regional Security Officer, Chasen Peabody iha ninia intervensaun hateten treinamentu ne’ebe sira tuir importante ba kuidade seguransa komunidade nian wainhira hetan sasan explozivu.

“Kursu ida ne’e reprezenta kursu sira seluk ne’ebe iha valor importante tebes tanba kursu ida ne’e hare’e liu ba ema nia seguransa wainhira hetan sasan explozivu sira ne’ebe maka fó perigu tebes ba ema nia seguransa,” hateten Chasen Peabody.

Nia mos fo hanoin nafatin ba membru sira atu uza skill ka matenek hodi bele halo asaun ba material funu nian hodi labele fó risku ba ita nia ann no liu-liu ba sosiedade sira nia moris.

Treinador ba Formasaun ne’e Kyle Slovic haktuir iha tinan tolu ikus ida ne’e, membru PNTL sira fó ona servisu tomak ne’ebe maka bo’ot tanba ne’e sira merese hetan ita hotu nia apresiasaun.

“Sira hala’o Formasaun husi Nível Primeiru, Segundu no Terseiru no partisipantes sira hatudu duni sira nia potensial ne’ebe maka bo’ot tebes iha prosesu Formasaun ida ne’e, tanba sira iha ona esperiensia ne’ebe barak liu-liu iha seksaun EOD ninian,” nia dehan.

Iha serimonia enseramentu ne’e, partisipantes sira simu Sertifikadu hanesan apresiasaun ne’ebe hato’o husi ekipa Treinador sira. Biban ne’e, Komandu PNTL liu husi UEP hato’o Apresiasaun hodi fahe Sertifikadu ba Treinador sira ne’ebe maka oferese ona Formasaun ida ne’e.

Hola parte iha Serimonia ne’e Komandante Komandu Administrasaun Superintendente Xefe Polísia Natersia Eufrasia Soares Martins, reprezentante Embaixador USA iha Timor-Leste, Komandante Komandu Pesoal no Formasaun, Diretúr Diresaun Justisa no Disiplina, Komandante TLPDP, Asesor GNR Komandante UEP ho estrutura, partisipantes sira husi Kursu ne’e inklui ekipa Treinador sira husi Forsa Naval husi Estadus Unidus Amerika (USA).