Vatikanu Prepara ona Kapela Sistina ba Konklave Papa Foun

DILI, www.news-viptv.com – Vatikanu prepara ona Kapela Sistina atu simu Kardeál na’in 133 ba konklave hodi hili Papa ba dala 267.

Gabinete Imprensa Santa Sé nian fó sai ona imajen sira no vídeo hosi Kapela Sistina iha loron-sábadu bainhira preparasaun sira kontinua ba konklave ne’ebé hahú iha loron 07 Maiu.

Iha loron-sesta ne’e, ekipa bombeiru Vatikanu nian haree iha Kapela Sistina nia kakuluk nia leten hodi instala xaminé ne’ebé sei hasai suar koor rua, metan no mutin. Suar Metan signifika katak kardeál na’in 89 la konkorda kona-ba Papa tuirmai. Suar mutin hein atu fó sinál katak eleitór kardeál na’in 133 deside ona papa foun ne’ebé sei lidera Igreja Katólika ba futuru.

Eleitór kardeál sira sei hahú iha loron 7 fulan-maiu iha Bazílika São Pedro nian iha tuku 10:00 dadeer ho Misa votiva pré-konklavu Pro Eligendo Romano Pontifísiu, hodi reza ba Espíritu Santu nia orientasaun bainhira sira hili Amu-Papa foun.

Iha tuku 4:30 lokraik, eleitór kardeál na’in 133 sei halibur iha Kapela Paulina hodi reza Litánia Santu sira-nian, molok prosesa ba Kapela Sistina ne’ebé besik.

Tuir prosisaun, Kardeál sira halo juramentu ida hodi kompromete sira ida-idak atu kumpre ho fidelidade Munus Petrinum nu’udar Pastor Igreja Universál nian, se sira hetan eleitu.

Juramentu ne’e mós vinkula eleitór kardeál sira ba segredu absoluta kona-ba detalle hotu-hotu ne’ebé hale’u eleisaun ba Amu-Papa foun, enkuantu promete atu rejeita tentativa ruma hosi li’ur hodi muda eleisaun.

Mestre Serimónia Litúrjika Pontifísiu nian hafoin ne’e proklama ‘extra omnes’, hodi haruka ema hotu ne’ebé la envolve iha konklave atu sai hosi Kapela Sistina.

Tuir mai, Kardeál Raniero Cantalamessa, Pregadór Eméritu Uma-kain Papal nian, sei hato’o meditasaun daruak ba kardeál eleitór sira, iha Mestre Serimónia Litúrjika nia prezensa.

Hafoin ne’e, kardeál ho tinan 90 no Mestre Serimónia Litúrjika sira sai hosi Kapela Sistina no hahú votasaun.

Boletin votu dahuluk sei halo iha loron-kuarta, loron 7 fulan-maiu, iha kalan. Iha loron sira tuirmai, eleitór kardeál sira sei vota dala haat iha loron ida, dala rua iha dadeer no dala rua iha lokraik.

Boletin votu hotu-hotu sunu hotu hafoin, no suar sei sa’e hosi saida maka bele sai hanesan chaminé ne’ebé famozu liu hodi fó hatene ba mundu se Amu-Papa foun eleitu ona.