Xefi Estadu Husu Governu no PN Hadia Lei Rai no Investimentu

DILI, www.news-viptv.com – Xefi estadu husu Governu ho Parlamentu Nasionál hadia lei rai no lei investimentu. 

Prezidenti Republika (PR) Jose Ramos-Horta iha nia vizita estadu ba Laos hateten, Governu presiza hadia lei rai no lei investimentu seguransa no garantia ba investimentu sira tuir regras internasionál hodi dada investidor ba Timor-Leste.

PR Horta husu ba Parlamentu Nasional no Governu atu produz lei tenke kondis ho tratadu sira iha Organizasaun Mundiál Komersiu no ASEAN nian.

“Governu no Parlamentu tenke hare’e tratadus nasaun soberanu, ita hakarak hola parte iha ekonomia rejional mundiál, iha tratadus iha nia regras, be hotu-hotu kumpri. Rai bo’ot hanesan Xina, Amerika mos kumpri, ita nia adezaun ba WTO no ASEAN, oinsa ita hare’e ita nia Lei, ita nia lei mak tenke adapta ba tratadus sira ne’e, laos tratadus internasionál ida mak adapta fali ba lei nasional ida,” dehan xefi estadu iha komunikadu imprensa ne’ebe redasaun assesu.

PR Horta preokupa ho lei investimentu no lei rai ne’ebe tenke hadia hodi fó resposta di’ak ba investimentu sira ne’ebe hakarak atu investe iha Timor-Leste.

Xefi estadu haktuir, iha fulan hira liu ba nia komvense investor kuaze atus tolu husi Xina mak ba Timor-Leste atu investe, maibé Governu la fó resporta.

Alende ne’e, xefe estadu husu ba governu atu halo lei protesaun ba investimentu no lei dupla tributasaun hodi hamenus selu tasa sira.

Iha vizita Laos nian, Xefi estadu halo vizita ba Zona Ekonomika Espesiál Sayettha (SCDZ) iha Vientiane, ne’ebé simu husi Thanongxay Koutphaithun, Xefe Komisaun Jestaun Zona Ekonomika Espesiál Vientiane. Kobre kilómetru kuadradu 11.5, SCDZ dezenvolve hamutuk husi governu Xina no Laos no ninia objetivu mak atu atrai investimentu estranjeiru iha indústria, lojístika, komérsiu, turizmu no propriedade. Liu tokon US$ 400 mak investe ona iha zona ne’e.