Dili, WWWNEWS-VIPTV.COM— Prosesu rekonsiliasaun no estabilidade iha Timor-Leste sai asuntu importante iha audiénsia entre Prezidente Repúblika, José Ramos-Horta, ho delegasaun Parlamentár Alemaña, lideradu husi membru Parlamentu Alemaña, Malte Kaufmann, iha Palásiu Prezidensiál Nicolau Lobato, Dili.
Delegasaun Parlamentár Alemaña louva vizaun Prezidente Repúblika Timor-Leste, José Ramos-Horta, kona-ba promosaun pás, rekonsiliasaun nasionál no dezenvolvimentu sustentável, durante audiénsia iha Palásiu Prezidensiál Nicolau Lobato, Dili.
Membru Parlamentu Alemaña, Malte Kaufmann, ne’ebé reprezenta delegasaun, hato’o admirasaun ba lideransa no vizaun Prezidente Ramos-Horta nian atu harii futuru ne’ebé estável no prósperu ba povu Timor-Leste.
Kaufmann konsidera audiénsia ho Xefe Estadu nu’udar pontu importante ida iha sira-nia vizita rejionál, no subliña katak kompromisu ba pás no estabilidade iha Timor-Leste sai baze importante ba dezenvolvimentu nasaun nian.
Iha enkontru ne’e, parte rua mós ko’alia kona-ba esperiénsia rekonsiliasaun pós-konflitu Timor-Leste nian no kompara ho prosesu rekonstrusaun no rekonsiliasaun iha Europa hafoin Segunda Guerra Mundiál. Esperiénsia istórika hirak-ne’e hatudu importánsia diálogu, diplomásia no kooperasaun atu hametin estabilidade no prevene konflitu iha futuru.
Kaufmann destaka katak manutensaun pás nasionál iha Timor-Leste iha ligasaun direta ho esforsu atu kria oportunidade servisu, promove kresimentu ekonómiku no fó perspetiva di’ak ba juventude.
Aleinde asuntu pás no rekonsiliasaun, diskusaun ne’e mós fó atensaun ba oportunidade atu hametin relasaun ekonómika entre Timor-Leste no Alemaña, liuliu liuhusi atrasaun investimentu europeu. Europa konsidera nu’udar parseiru potensiál importante ba Timor-Leste, inklui iha kontestu ligasaun ekonómika ho rejiaun ASEAN.
Enkontru ne’e mós sei kontinua ho partisipasaun Prezidente Ramos-Horta iha selebrasaun Loron Unidade Alemaña, ne’ebé sei realiza iha loron tuirmai. Prezidente sei hasoru malu ho Malte Kaufmann, membru delegasaun no Embaixadór Alemaña, atu hametin amizade no kooperasaun entre nasaun rua.
Audiénsia ne’e reflete esforsu diplomátiku atu hametin relasaun bilaterál entre Timor-Leste no Alemaña, ho fó énfaze ba pás, estabilidade, investimentu no dezenvolvimentu ekonómiku nu’udar área kooperasaun importante ba futuru.
