PSHT Kondena no Konsidera Aktu Pedro Aparicio Inmoral

DILI, www.news-viptv.com – Relasiona ho deklarasaun politika Sekretariu Jeral Persaudaraan Setia Hati Terate (PSHT), Pedro Aparicio iha atividade politika apoia ba kandidatu prezidenti republika Francisco Guterres Lu-Olo hodi insulta pessoal Xanana Gusmao, Ramos Horta no Mariano Assanami Sabino hamosu lamentasaun makas hosi nia organizasaun rasik.

Liu hosi konferensia imprensa ne’ebe realia ohin, Sergio Ilidio Borges de Deus nudar sekretariu jeral Organizasaun Joventude Resistensia Fuan Domin Timor-Leste kondena statementu Pedro Aparicio ne’ebe konsidera inmoral no la respeita figura Xanana Gusmao nudar Komandante FALINTIL.

Iha konferensia imprensa ne’e, Sergio mos esklarese katak iha statementu Pedro Aparicio nian ne’e nudar statement pessoal no la reprezenta PSHT, tamba tuir estatutu PSHT nian bandu lori organizasaun ba tama iha partidu politika ruma.

Iha fatin seluk, Movimentu Junta Salvasaun Timor-Leste mos kondena statementu Pedro Aparico hasoru ema nia pessoal no konsidera ida ne’e aktu anti-demokratiku ne’ebe la kontribui ba dezemvolvimentu nasional.

Ho Situasaun politika Timor-Leste dadauk ne’e, Francisco Maukura hateten, Povu Timor-Leste presiza duni figura Ramos Horta atu sai prezidenti republika hodi rekopera situasaun politika ne’ebe fo impaktu makas ba ekonomia no dezemvolvimentu.

Iha parte seluk, Maukura mos fo hanoin ba Pedro katak kareira ne’ebe nia goza dadauk ne’e njudar advogadu rezultadu ida hosi governasaun lideransa Xanana Gusmao ne’ebe tau fundu kapital umanu hodi apoia setor judisial.

Reporter: Justinho Mendonca  I  Cameraman: Leonito de Fatima