DILI, www.news-viptv.com – Hodi rekoñese natureza úniku hosi sira-nia funsaun nu’udar ajentes espesializadu ba protesaun sivíl no importánsia hosi sira-nia papél iha protesaun ba vida umana, no beins nune’e mós hodi responde ba situasaun emerjénsia, asidente, no dezastres iha teritóriu nasionál tomak, Governu liu husi sorumutu Konsellu Ministru, Kuarta (11/2/2026) aprova ona projetu Dekretu-Lei, ne’ebé aprezenta hosi Primeiru-Ministru, Kay Rala Xanana Gusmão, no Ministru Prezidénsia Konsellu Ministrus Agio Pereira kona-ba Rejime Karreira Espesiál ba Bombeirus Profisionál Timor-Leste.
“Ho diploma ida-ne’e, Governu hakarak estabelese estatutu espesífiku ba bombeirus profisionál iha Timor-Leste,” sita komunikadu imprensa ne’ebe publika iha Portal Governu.
Rejime ne’ebé propoin ho ninia objetivu atu define karreira bombeirus profisionál hanesan karreira espesiál iha funsaun públika, estabelese ninia estrutura ierárkika, kategoria no pozisaun sira, no mós regras ba rekrutamentu, formasaun, progresaun no promosaun.
Ho inisiativa ida-ne’e, Governu buka atu valoriza no dignifika karreira ne’e, asegura estabilidade ne’ebé boot liu no enkuadramentu profisionál, no reforsa kapasidade atu responde ba sistema nasionál protesaun sivíl.
