VIP TV Sertifika Estudante Nain 12 Ne´ebe Kursu Jurnalista

DILI, www.news-viptv.com – Media online Video Information Provider Television (VIP TV) sertifika estudante nain 12 ne´ebe pasa formasaun jurnalismu nian iha Sentru Formasaun VIP TV.

Evangelisto Gantry dos Santos Meilana nu´udar formador esplika sstudante nain 12 ne´e kompostu hosi feto nain 7 no mane nain 5 tuir ona formasaun durante fulan 6 hahu Fevereiru to´o Agostu 2022.

“Durante iha formasaun, sira aprende buat barak kona ba oinsa aprende servisu iha mundu jurnalismu nian. Alende teoria ne´ebe sira aprende, sira mos ami haruka pratika halo cobertura no hakerek notisias, ne´ebe nia resultadu maioria ami publika iha portal VIP TV,” esplika Gantry Meilana, hafoin fahe sertifikadu ba estudante sira, Sabadu (13/8/2022) iha Edifisiu VIP TV, Kakaulidun, Dili.

Formador ne´e esplika, sira ne´ebe passa iha formasaun, hetan mos oportunidade hodi estajiariu iha redasaun VIP TV hodi buka tan esperensia servisu nian tuir sistema ne´ebe aplika iha media online ne´e.

“Depois formasaun, sentru formasaun ami nian recomenda fali ba redasaun VIP TV atu bele simu sira ba faze estajiaru,” esplika formador ho esperensia servisu jurnalista liu tinan 20.

Reprezenta estudante sira, Laura Salsinha Martins agradese ba Sentru Formasaun VIP TV liliu ba formador sira nian ne´ebe fahe ona matenek kona ba oinsa halo servisu iha mundu jornalista nian.

“Agradese ho matenek ne´ebe fahe, no oportunidade ne´ebe fo ona ba ami hotu bele hatene ona oinsa los ami halo servisu wainhira haknar an iha vida jornalista nian,” dehan Laulara.

Nune´e mos Naomi Sarmento, estudante ne´ebe mai hosi Loes, Munisipiu Liquica senti kontenti ho rezultadu formasaun ne´ebe nia hetan hosi sentru formasaun ne´e.

“Hau hakfodak ho rezultadu ne´ebe hau hetan, tambá antes ne´e hau la hatene buat ida saída maka mundu jurnalista no oinsa halo servisu nudar jornalista nian. Maibe, depois aprende iha VIP TV maski foun maibe formador konsege hanorin ami no bele halo notisias, inklui halo cobertura no intervista ho fontes sira iha terreru,” komentariu Naomi Sarmento.

Sentru Formasaun VIP TV parte ida hosi atividade principal tolu ne´ebe VIP TV iha alende servisu media online nian ne´ebe produs notisias no halo production house ou casa produsaun.