Timor-Leste Partisipa Kongressu AIM iha Abu Dhabi

DILI, www.news-viptv.com – Ministru Komersiu no Industria, Nino Pereira reprezenta Vise Primeiru Ministru no Ministru Koordenador assuntu Ekonomiku no Ministru Turizmu no Ambiente Francisco Kalbuadi Lay, partisipa Sorumutu Meza Redonda Ministeriál kona-ba Investimentu iha Setór Turizmu, hosi loron 7 to’o 9 fulan Abril 2025, iha Abu Dhabi, Emiradus Árabes Unidus.

Komunikadu ne’ebe redasaun simu esplika, kongresu ne’e sai hanesan eventu markante ida iha domíniu investimentu globál nian no sei analiza no define fila-fali diresaun sira investimentu globál nian iha futuru, hodi haka’as-an ba estrutura mundiál ne’ebé ekilibradu no oferese hanoin hirak ne’ebé iha valór atu foti desizaun finanseira ne’ebé informadu aliña ho objetivu estratéjiku.

Kongresu AIM tinan ida-ne’e hala’o ho tema “Mapeamentu ba Futuru Investimentu Global nian: Onda Foun Paizajen Investimentu Globalizadu nian – Hasoru Estrutura Mundial Foun ida ne’ebe Ekilibradu”. No sei fornese plataforma ida ne’ebé laiha paralelu hodi aproveita perísia koletiva no perspetiva oin-oin hosi ninia partisipante sira, hodi dudu progresu ekonómiku no haburas ekonomia globál ida ne’ebé prósperu liu.

Iha âmbito kongresu ne’e Ministru Nino Pereira aprezenta plataforma no kompromisu ne’ebé bo’ot atu forma oportunidade investimentu turizmu liu husi inovasaun polítika.

Tendénsia emerjente sira forma futuru investimentu turizmu nian iha Timor-Leste no rejiaun ne’e inklui nesesidade aumenta ba turizmu ekonómiku no esperiénsia viajen sustentavel, transformasaun dijitál iha servisu turizmu nian, no interese ne’ebé aumenta ba turizmu komunitáriu. Iha mós dudu rejionál ida ba infraestrutura reziliente no dezenvolvimentu turizmu klimatiku. Tanba iha Timor-Leste iha Planu Estrategiku Dezenvolvimentu 2011-2030 (PED).

Timor-Leste prepara hela atu kapitalizasaun ba tendénsia hirak-ne’e liuhusi:

1. Promove turizmu ekonómiku no turizmu bazeia ba patrimóniu, hodi fó ninia biodiversidade no rikusoin kulturál sira;
2. Dezenvolve infraestrutura turizmu, hanesan habelar aeroportu no hadi’a konetividade;
3. Enkoraja investimentu setór privadu liu husi reforma reguladora no insentivu sira;
4. Haforsa kapitál umanu ho formasaun no kapasitasaun relasiona ho turizmu; no
5. Kolabora ho parseiru rejionál no ajénsia internasionál sira atu aliña ho padraun ASEAN no turizmu global.

Iha ambitu kongresu AIM ne’e Ministru Nino Pereira hamutuk ho líder globál no polítiku sira hala’o diskusaun klean kona-ba papél krítiku Governu nian hodi haburas setór turizmu ne’ebé buras liuhosi polítika ne’ebé efetivu.

Partisipasaun Timor-Leste nian iha sorumutu ne’e bele aprende husi nasaun oin-oin ho modelu hanesan ne’ebé bele sai ajustavel iha termu lisaun aprende, esperiénsia reforma iha polítika, enkuadramentu legál no aspetu sira seluk ne’ebé relasiona ho envolvimentu parseria publika privadu.

Ministru Nino Pereira akompaña de’it ba Señor Elias de Jesus Fátima, Koordenador ba Gabinete Kooperasaun, Parseria no Reforma Ministériu Komérsiu no Indústria nian, no sei fila-fali mai Díli iha loron sesta-feira, 11 abril.