Suspende ESTV Raikala, Alumni Lamenta Dezisaun MEJD 

Ermera, www.news-viptv.com – Alumi Eskola Secundariu Tekniku Vokasional (ESTV) Raikala lamenta total desizaun husi Ministeriu Edukasaun, Juventude no Desportu (MEJD) ne’ebé foti desizaun hodi suspende atividade eskola.  

Porta Voz Alumni ESTV Raikala, Floriano do Carmo Afonso, dezisaun MEJD hodi suspende atividade eskola kontradis tebes ho planu nasional ministeriu nian tamba eskola refere produs ona rekursu humanu ne´ebe alumni balun kria ona kampu servisu ba a’an rasik.

“Desizaun politika Ministeriu Edukasaun nian ne´e laos estratejia signifikativu atu resolve problema, mesmu eskola menus iha fasilidade no mobiliariu, ne´e responsalidade Governu nian laos hanoin atu taka,” deklara Floriano iha konferensia imprensa foin lais ne´e.

Tuir alumni sira, sei governu bele tau orsamentu miliaun hodi apoia atividade arte marsiais, tamba sa la tau osan ba fasilidade ne´ebe menus iha eskola refere.

“Governu tau osan importansia ba arte marsiais hanesan hasa´e konflitu,” nia dehan.

Nia esplika, baseia ba konstituisaun iha artigu 59 koalia kona ba edukasaun, iha alinea ida koalia kona ba edukasaun no kultura, iha alinea rua koalia kona-ba ema hotu iha direitu hanesan ba oportunidade atu eskola no formasaun servisu Professional sira, no tuir Dekretu Lei Nú 14/2008 hatudu fundamentu boot teb-tebes ba edukasaun hateten katak labarik iha tinan 6 to 27 ne’ebé populasaun hot-hotu ne’ebe iha vontade atu estuda tenke hahu husi Ensinu Baziku to’o iha Ensinu Superior, hatudu ba ida nee maka Ministeriu Edukasaun mak suspende duni ida nee sai preokupasaun bo´ot ba komunidade iha aréa remotas.

“Govenru tenki tau asuntu ne´e seriu hodi buka solusaun, alumi prontu ho autoridade no inan aman joventude hodi kontinua ho asaun halo demostrasaun,” deklara Floriano.

ESTV Raikala durante ne´e sai sentru edukasaun ba estudante sira ne´ebe akaba sira nia estudu hosi EBC Goulolo, EBC Eraulo, EBC Humboe, EBC Raimerhei no Eskola Kablake, maibe ho dezisaun MEJD taka, sai problema bo´ot ba sira.

Maski, simu ona informasaun hosi MEJD katak atividade eskola suspende, Diretur ESTV Raikala, Zeca Martins Nunes kontinua prosesu aprendizajem iha eskola refere tamba sedauk simu karta despaixu kona ba suspensaun eskola refere.

“Ami seduak simu karta suspensaun, eskola lao nafatin,” dehan Zeca Nunes.

Lamentasaun mos hato´o hosi Xefe Suku Estadu, Julio Salsinha dehan wainhira MEJD taka eskola refere hamosu problema bo´ot ba komunidade nia oan sira ne´ebe hakarak kontinua sira nia eskola ba nivel tuir mai.

“Sei fasilidade balu laiha Ministeriu tenke hadia, labele taka nee ami hanoin labele,” komentariu xefi suku ne´e.

Representante Inan aman Estanislau Fatima hamutuk ho inan-aman estudante sira sei hasoru responsavel MEJD hodi la aseita ho dezisaun taka atividade eskola.