DILI, www.news-viptv.com – Rekonese Parlamentu Nasional nu´udar fatin ba aspirasaun povu no atu servi povu diak liu tan, Prezidenti Parlamentu Nasional (PPN) foun, Maria Fernanda Lay promete sei hametin relasaun diak ho Governu nu´udar orgaun ezekutivu.
PPN Fernanda Lay deklara ne´e iha nia deskursu dahuluk hafoin eleita nu´udar PPN foun hosi Partidu CNRT no PD hodi troka Aniceto Guterres.
“Dalan lós liu maka ita sei hamutuk hakat ba mudansa, hametin relasaun di´ak ho órgauns Estadu sira seluk, liu-liu ho Governu, no instituisoins sira seluk hodi servi di´ak liu ita nia povu,” dehan Fernanda Lay, Kinta (22/6/2023).
Nu´udar Timor oan, nia hateten, hothotu orgullu tanba kontribui ona ba prosesu demokrátiku ho matenek no maduru hodi jere diferensias, partidus politikus hotu-hotu mantein Pás no timor-oan nia unidade metin no sei forte ba beibeik.
Iha faze foun nee, nia hateten, halo Estadu Timor-Leste no Povu bele hiit ulun, hateke dook ba oin ho Fiar-Án, sai orgulho núdar Estadu ida neebé independente no demokrátiku. Hodi dignifika mártires da Pátria sira nia mehi, hodi lori Povu doben Timor-Leste ba moris diak iha Estadu de Direito Democrático.
“Hanesan segundu órgaun do Estadu, Parlamentu Nasional iha Sexta-Legislatura simu naha-todan tanba tenke konsolida hikas ita nia instrumentus legais sira, atu responde ejizénsia povu nian. Tanba iha tempu naruk ita hotu hare no rona, povu lakohi atu hein kleur tán,” dehan Fernanda Lay.
Iha nia deskursu, feto dahuluk ne´ebe asumi kargu iha orgaun segundu Parlamentu Nasional ne´e mos hato´o nia agradesementu ba konfiansa no fiar, neebé mai husi Prezidente Partidu CNRT Maun Boot Kay Rala Xanana Gusmāo ho Sekretáriu-Jeral Francisco Kalbuadi Lay, no Partidu Demokrátiku (PD).
“Hau hakruuk ba Estrutura tomak Partidu CNRT no PD, militantes, aliadus, simpatizantes no Povu tomak neebé fó ona fiar ba Partidu CNRT hodi lidera Parlamentu Nasional. Konfiansa nee sei la monu-ba-rai. Konta mós distibtos deputadas no deputados sira hotu nia apoio iha alto plenáriu sexta-legislatura ida nee, halo hau fiar metin, ita-hotu sei hamutuk halao mandatu tuir deit Konstituisaun haruka núdar lejizlador, fiskalizador no desizaun polítika,” nia dehan.
Hodi hatutan, “Hau kompromitidu sei fó kontinuidade ba servisus hirak neebé lao ona husi Prezidente Parlamentu Nasional sesante, sei mantein komunikasaun ho sira, hau mós sei dere Bankada idak-idak nia odomatan no deputados sira idak-idak, hodi konsolida diak liután funsionamentu órgaun lejizlativu ida ne´e. Parlamentu Nasional alem de tenke sai órgaun povu nian, iha fatin nee duni, ita-hotu sei dignifika órgaun lejizlativu ida nee ho produtos lejizlasaun no polítika ne’ebé aposta ba dezenvolvimentu inkluzivu.”
Nia mos fiar metin hamutuk ho distintos deputados 64 iha Parlamentu sei servisus komisoens espesializadas parlamentares sei funsiona di´ak liután.
“Ita sei mantein relasaun di´ak ho Partidus hotu-hotu, hametin relasaun ho media no ONG sira, ita sei fortalese relasionamentus grupos amizade parlamentares ho País sira seluk; ho País ASEAN nian, Komunidade Lingua Portuguesa CPLP, AP-CPLP, IPU, APA, AIPA, no Paizes membrus do g7 plus (g7+), no seluk-seluk tán,” nia dehan.
Nia mos apela ba komponentes sira hotu; liu-liu ba funsionáriu Parlamentu Nasional, assessores, téknikus apoio bankadas parlamentares, seguransa no kontratadus iha ámbitu Parlamentu Nasional atu kolabora malu, tenke servisu hamutuk – hametin team work no presta ita-bo´ot sira nia dezenpeñu, ho dedikasaun, badinas no profesional. Tanba povu hein hela, povu hakarak moris di´ak lalais.
“Ita-nia Estadu ejiji atu rekopera lalais Timor-Leste nia ekonomia no joven barak tebes hakarak oportunidade ba empregu, no setor privadu presiza ambiente negosiu ida ne´ebé saudável,” nia dehan.
Parlamentu Nasional, nia esplika, tenke foti papel núdar instituisaun catalisadora ba próximo Governo atu servisu ezekutivu nian la´o di´ak, Governo mai ne´e tenke lori programa ida pro-povu no orsamentu ida ne´ebé mak bele responde duni povu hodi hetan moris di´ak.
Iha votasaun hili PPN foun, maski nu´udar kandidata uniku, Maria Fernanda Lay hetan votos afavor hamutuk 45, abstensaun 19 no branku 1.