SEKoop Halo Promosaun ba Bafo Kayrala

DILI, www.news-viptv.com –  Sekretariu de Estadu Kooperativa (SEKooP) halo promosaun ba produtu husi Batar-Fos (Bafo) Kay Rala, Kuarta (18/12/2024), iha Salaun Delta Nova, Comoro, Dili.

Iha promosaun ho tema promove produtus kooperativa Bafo Kayrala ho orgulu no prosperidade, Sekretariu Estadu Kooperativa, Arsenio da Silva hateten promosaun ne’e laos deit iha nasional, maibe halo mos iha nivel munisipiu sira tuir orientasaun PM Xanana Gusmão.

Bafo Kayrala, esplika membru governu ne’e, produz ona iha Suai, Maliana, Lautem, Liquisa no Manufahi, no governu orineta ona mos atu Bafo Kayrala mos bele promove iha ristorante sira.

Ho produsaun ne’ebe foin hahu, nia hateten, governu sedauk bele fornese fini ne’ebe iha epoka tuir mai maka foin bele fornese.

Vise Ministra assuntu ASEAN, Milena Rangel hateten, ho produsaun Bafo Kayrala bele fo kontribuisaun mos bai ha Timor-Leste nia seguransa alimentar, no depois bele halo exportasaun ba rai liur.

Nune’e mos Ministro Interior, Francisco Guterres kongratula ba servisu SEKoop nian ne’ebe hamosu tan produtu nasional ida hodi bele hamenus mos problema social, liliu iha seguransa.