SEKOMS Kontinua Politika Sosa Jornal

DILI, www.news-viptv.com  – Sekretaria Estadu Komunikasaun Sosial (SEKOMS) kontinua nia politika parseria ho media konvensional lima (5) sira hodi sosa sira nia jornal.

Politika sosa jornal media 5 ne’e maka Jornal Suara Timor Lorosa’e (STL), Timor Post, Diario Nasional, Dili Post ho Jornal Independente ne’ebe selebra husi asina kontratu, Kinta (20/02/2025) iha Salaun PCM, Palacio do Governo, Dili.

Iha nia deskursu, Sekretariu Estadu Komunikasaun Sosial, Expedito Loro Dias Ximenes esplika katak politika governu hodi sosa jornal ne’e laos programa foun, maibe programa kontinuasaun ne’ebe implementa desde tinan 2023 hodi konsidera media konvesional sira ne’e nu’udar pilar importante iha unidade nasional ba demokrasia.

“Governu asina ho media 5 ne’e atu bele hala’o distribuisaun jornal ba iha munisipio sira,” dehan Expedito Ximenes.

Ba tinan 2025, Governu iha mudansa ba orsamentu ne’ebe antes ne’e iha tinan 2024 Governu sosa ho 180 exemplar kada loron, tinan ne’e Governu sosa deit ho montante 100 exemplar kada loron hodi distribui ba munisipiu sira.

Ba pagamentu ne’ebe sedauk selu iha 2024, SEKOMS sei selu tinan 2025.

Maski nia rasik konsidera jornal ema ladun le’e ona relasiona ho mudansa teknolojiaba membru governu ne’e kontinua konsidera jornal nafatin importante ba informasaun iha publiku.

“Ami senti katak informasaun sei presija nafatin tamba media ho nia informasaun fo ba iha publiku ne’e iha formatu oi-oin, ida mak audio, televisaun, ida fale mak liu husi jornal, tamba jornal iha nia ponte forte, ita le bele repete fale, ho televisaun ho main stream barak maibe iha husi aspetu atualidade, maibe jornal sei nafatin iha ponte forte ba sira ne’ebe hakarak repete le’e fali,” esplika sekretariu estadu ne’e.

Iha fatin hanesan, Diretor Timor Post Jacob Ximenes ba jornalista sira hateten, agradese ba Governu ne’ebe kontinua hakarak servisu hamutuk ho jornal sira liu husi sosa jornal hodi distribui ba munisipiu sira.

“Jornal sira laiha intensaun seluk atu buka lukru, se buka lukru, ha’u hanoin ho distribuisaun jornál ne’e, laiha vantajen ne’ebé di’ak ba média konvensional, liuliu media imprimi,” hateten Jacob.