Seguransa Diak, Embaixada Xina Promete Sei Lori Investidor Mai Timor-Leste

DILI, www.news-viptv.com – Embaixada Xina iha Timor-Leste sei aproxima investidor Xineza sira hodi investe iha Timor-Leste.

Hafoin inkontru konjunta tripartida entre Embaixada da República Popular da China iha Timor-Leste, hamutuk ho Polísia Nasionál Timor-Leste (PNTL), representante sira husi empresa investimentu Xineza, no asosiasaun komunidade Chinese,  Embaixadora Xina iha Timor-Leste, Wang Wenli hateten, investidor Xina prontu atu investe iha Timor-Leste wainhira seguransa lao ho diak.

Ba situasaun Timor-Leste, Embaixadora Wenli louva ba servisu PNTL ne’ebe diak hodi Xineza sira bele halao sira nia atividade negosiu ho diak.

“Seguransa tenki diak, hodi bele atrai invetidor husi Xina mai Timor-Leste,” hateten Embaixadora Wenli ba jornalista sira, Tersa (25/2/2025) iha Embaixada Xina nian, Dili.

Hodi hatene tan “Ami konsidera servisu husi PNTL ida nebe efisiente no hetan rezultadu diak, inklui membru sira husi embaixada xina no staff husi empreza sira ne’ebe sente seguru hodi halo servisu iha tempu loron no kalan”.

Komandante Jeral PNTL, Komisariu Henrique da Costa hateten, prezensa parte PNTL iha inkontru refere hodi fahe informasau ba situasaun seguransa iha Timor-Leste ba embaixada Xina no Emprezariu Xineza sira iha Timor-Leste.

“Inkontru ne’e ba daruak ona, intensaun hakarak pasa situasaun seguransa iha Timor-Leste, ita hatene katak sira nebe hakarak investe iha Timor-Leste persiza hare situasuan seguransa,” esplika Komisariu Henrique.

PNTL, esplika Komisariu PNTL ne’e, instala ona komunikasaun emerjensia nian entre PNTL ho emprezariu Xineza sira tantu iha Dili no munisipiu, wainhira iha situasaun saida deit bele komunika ho komandante munisipiu ou Postu, bainhira persiza tulun husi seguransa nian.

Reprezentante empresa Xineza no komunidade Xineza hato’o mekanizmu tripartida ne’ebé efikazmente aumenta seguransa no kria oportunidade ba investimentu, produsaun, no moris iha Timor-Leste. Sira hateten katak konfia an liu ba kooperasaun no kompromisu atu kontribui tan ba amizade China-Timor-Leste.