banner 728x250

Ramos Horta Lansa Filmi Tatiana

  • Share

DILI, www.news-viptv.com – Premiadu Nobel da Paz, Dr. Jose Ramos Horta lansa filmi Tatiana ne’ebe produz hosi Mahowe’en Film ho Video Information Provider Television (VIP.TV), Kinta (23/12/2021), iha Salaun Konferensia Kofi Anan, UN House, Dili.

Premeadu Nobel da Paz, Dr. Jose Ramos Horta iha nia intervensaun fo apresiasaun ba Mahowe’en Film ho nia ekipa ne’ebe bele halo realidade moris labarik sira hodi sai istoria filmi.

banner 336x280

“Inisiativa diak ba filmi ne’e, ne’ebe produz hodi hatudu realidade moris labarik sira ne’ebe ajuda sira nia inan-aman, liliu iha Mota Komoro,” komentariu Dr. Jose Ramos Horta iha nia intervensaun antes lansamentu.

Iha tempu nia sei asumi knar nudar prezidenti republika, Dr. Jose Ramos Horta konta nia mos sempre hare situasaun iha Mota Komoro, liliu inan ho labarik sira ne’ebe ajuda sira nia laen hodi pinera rai henek no tempu ne’ebe konsege mos fo apoiu material pinera rai henek nian.

“Situasaun labarik sira iha Timor-Leste laos kategoria traballador infantile, labarik sira maka hakarak ajuda sira nia inan-aman,” dehan Ramos Horta.  

Filmi Tatiana nu’udar filmi fiksaun ida hakerek hosi Dino Hanjam ne’ebe foti kona ba realidade moris labarik ki’ik oan sira iha Mota Komoro hodi ajuda sira nia nian aman hodi sutenta sira nia moris.

“Ho realidade moris ne’e entaun hau foti istoria ida ne’e hodi sai filmi no dezemvolve istoria ne’e kona ba susesu labarik sira ne’ebe moris hodi ajuda inan-aman hodi fan dosi, modo, manu-tolun no sel-seluk to’o sira hetan susesu iah sira nia moris futuru,” esplika Dino Hanjam.

Antonia Ximenes nudar ezekutivu produtor ba produsaun filmi ne’e hateten, filmi ne’e rasik mos foti hosi nia realidade moris ne’ebe mos senti ona nudar labarik ne’ebe moris iha Mota Komoro.

“Hau mos uluk moris iha Mota Komoro, hau sente hotu oinsa labarik sira agora sente. Tamba ne’e hau hakarak produz filmi ne’e ho kolega sira,” dehan Antonia Ximenes alias Lotuinha.

Iha nia produsaun, filmi ne’e produz hosi VIP.TV ne’ebe lidera hosi Evangelisto Gantry dos Santos Meilana nu’udar mos produtor.

“Filmi ne’e ami produz hahu iha meudiu Jullu 2021 no remata iha Dezembru, momentu ne’eba sei iha situasi estadu emerjensia ne’ebe iha prosesu fiilmazem ami mos hasoru dezafiu barak tamba COVID-19 ami tenki fahe autor sira ho didiak tamba situasaun bandu labele halibur malu ho ema barak, mais Graca de Deus ho tulun Nai Jesus nian filmi ne’e ami bele lansa ohin,” dehan Gantry Meilana.

“Hau reprezenta autor sira iha laran, husu ba Governu liu hosi filmi ne’e bele tau matan liu tan ba realidade moris labarik sira ne’ebe ajuda sira nia inan-aman hodi fan sasan iha estrada ninin,” hateten Alexandra Ximenes ne’ebe iha filmi ne’e maka sai aktora principal nudar Tatiana.

Prezensa iha lansamentu filmi ne’e maka Reprezentante UNICEF iha Timor-Leste, Billal Durani no reprezentante ILO nian iha Timor-Leste no aktores labarik sira ne’ebe involve iha filmi refere, inklui familia 15 nudar inan sira ne’ebe durante ne’e mos servisu pinera rai henek iha Mota Komoro.  

Filmi Tatiana ne’e rasik involve kuaze ema nain 30 resin ne’ebe maioria labarik sira no finansiamentu produsaun filmi ne’e rasik hosi Mahowe’en Film no hetan finansiamentu uituan hosi Sekretaria Estadu Arte no Kultura no pessoal balun.

Iha fatin hanesan, Dr. Jose Ramos Horta mos fo apoiu hahan ba familia 15 ne’ebe nudar inan feto sira ne’ebe durante ne’e servisu pinera raihenek iha Mota Komoro.

  • Share

Leave a Reply

Your email address will not be published. Required fields are marked *