R-KATL Ejiji Governo Tau Prioridade ba iha Setor Produtivu

Dili, www.news-viptv.com – Redi Koligasaun Agrikultura Timor-Leste(R-KATL) organizasaun konjuta ne’ebe envolve grupu agrikultura sira, grupu ema ho defisiensia, setor privadu, organizasaun Joventude, LGBTQI, Grupu Kooperativa, Movimentu Sosial, hare katak Timor-Leste seidauk hatudu dezempenu ba investimentu real iha setor produtivu no setor importante sira seluk, atu bele sai baze hodi garante ekonomia Timor- Leste nian iha futuru oin Mai.

Prezidente R-KATL, Alberto Martins Guterres hateten, Governo tenki tau prioridade oh aba setor produtivu hodi labele depende ba setor mina no gas, tamba setor ne’e loron ida sei hotu.

“Investimentu ba setor Agrikultura 2.1%, oinsa bele dezenvolve setor agrikultura ne’e ho diak. Bele halakon tiha pontu ne’e, atu nune’e bele sai 21%. Ita nia hakarak investimentu ne’ebe diak ba Agrikultor sira, maibe Governo laiha seriadade ba iha area ida ne’e, desde tinan naruk ita koalia asuntu ne’e fila-fila maibe Governo la tau preoridade ba iha setor Agrikultura,” hateten Alberto ba jornalista sira iha konferensia imprensa, foin lais ne’e iha Farol, Dili.

Parte seluk, redi ne’e mos husu ba governu atu hare mos setor infraestrutura liliu Estrada ne’ebe liga ba agrikultor sira nia produsaun atu nune’e bele lori ho fasil no lais ba merkadoria ne’ebe besik hosi sira nia area produsaun.