banner 728x250

Prezensa Menzies Hodi Fortalese Sistema Saúde iha Timor-Leste

  • Share
Ekipa Menzies iha Timor-Leste. Photo: Menzies Media Officer
banner 468x60

DILI, news-viptv.com – Menzies School of Health Research (Menzies) ohin Segunda (13/9/2021) kompleta nia tinan rua ba estabelese nia eskritóriu iha Timor-Leste ho nia objetivu hodi fortalese Sistema saude iha Timor-Leste.

“Menzies servisu hamutuk ho Governu Timor-Leste no parseiru sira atu haforsa sistema saúde nian hodi responde ba dezafiu husi moras infesiozu sira,” hakerek komunikadu imprensa ne’ebe redasaun simu ohin.

banner 336x280

Menzies nia projetu sira iha Timor-Leste ne’e projetadu atu hasa’e kapasidade iha área klinikal, vijilánsia no laboratóriu, subliña kona-ba importánsia husi sistema saúde nian hala’o servisu hamutuk hodi mellora resposta ba moras infesiozu sira, tantu ba iha pasiente individual no nível saúde públiku.

Liu-husi projetu oioin ne’ebé la hanesan, peskiza uza ona hanesan instrumentu ida hodi kompriende epidemiolojia moras nian no investiga impaktu potensial husi mudansa sistema saúde.

Ho apoiu husi Fleming Fund country grant, Menzies adapta ona sira nia servisu atu inklui abordagem One Health, suporta servisu saúde humana no saúde animal hodi responde ba dezafiu sira husi rezisténsia antimikróbiu iha Timor-Leste.

Dr Josh Francis hateten, “Bakteria ne’ebé mak rezistente ba antibiótiku, ita normalmente uza hodi trata infesaun sira eziste iha Timor-Leste. Bakteria sira ne’e hela iha meiu ambiente, no sira afeta animal no ema humanu sira. Uza abordagem One Health, Ministerio da Saúde (MdS) no Ministériu Agrikultura no Peskas (MAP) hala’o servisu hamutuk hodi kompriende situasaun reál husi rezisténsia antimikróbiu nian iha Timor-Leste no responde ba ida-ne’e ho maneira ne’ebé mak garantia populasaun Timor oan bele asesu ba tratamentu loloos ba infesaun sira ne’ebé grave.”

Desde tinan 2020, servisu husi projetu STRONG TL nian espande ona signifikativamente hodi inklui apoiu bo’ot ba resposta COVID-19 iha Timor-Leste, inklui treinamentu no asisténsia téknika hodi asegura katak teste ba COVID-19 ne’e bele hala’o iha Timor-Leste ho seguru, kredível no efisiente.

Total númeru teste PCR COVID-19 ne’ebé hala’o ona iha Timor-Leste to’o fulan Agostu 2021 ne’e, hamutuk 186,307 amostra.

Diretora Ezekutivu ba Timor-Leste nia Laboratóriu Nasional Saúde (LNS), Endang Soares da Silva, hateten parseria entre LNS ho Menzies ne’e ajuda ona LNS atu alkansa nia kapasidade hodi realiza teste diagnóstiku mikrobiolojia, diagnóstiku klinikal no vijilánsia ba moras infesiozu oin-oin.

“Ho apoiu husi Menzies, LNS halo ona progresu bo’ot ne’ebé mak destaka husi ami nia pesoal teknikal,” hateten Endang Soares da Silva.

“Tékniku hotu-hotu ne’ebé mak envolve iha treinamentu ne’e hasa’e ona sira nia kapasidade, sira nia koñesimentu no esperiénsia servisu iha mikrobiolojia, sira nia konfiansa atu relata rezultadu sira ne’ebé ligadu ho diagnóstiku, vijilánsia no peskiza.”

Servisu hamutuk ho LNS no Ministériu Saúde nomos nia Sentru Nasionál ba Vijilánsia no Peskiza Imunizasaun (NCIRS) Australia, Menzies mos implementa projetu sira ne’ebé haree kona-ba epidemiolojia COVID-19 nian no moras sira seluk ne’ebé bele prevene ho vasina, liu husi realizasaun vijilánsia serolójika iha Timor-Leste.

Dr. Nelson Martins hateten, “Estudu seroprevalénsia ne’e importante tebes atu kompriende imunidade individual nian ba moras sira ne’ebé mak bele prevene ho vasina no husi moras endémiku ne’ebé preventavel hodi ajuda MdS, parseiru dezenvolvimentu sira no komunidade dezenvolve intervensaun ne’ebé mais akuradu no bazeia ba evidénsia. Projetu ARIA-RISE tama mai iha tempu ne’ebé mak adekuadu, bainhira estudu seroprevalénsia ba imunidade COVID-19 nian ne’e nesesáriu tebes hodi guia desizaun lor-loron nian kona-ba prevene mutasaun altamente evolutiva husi SARCOV-19 no nia variante sira. Maske nune’e, Timor Leste nia relatóriu hatudu iha kobertura ne’ebé di’ak husi administrasaun vasina nian, imunidade reál ne’ebé dezenvolve husi vasina ne’e seidauk relata.”

Menzies nia projetu foun ida tan hanaran MATCH TL, sei ajuda atu haforsa diagnóstiku no vijilánsia ba moras infesiozu sira ne’ebé importante inklui malária, tuberkuloze no HIV, iha Timor-Leste.

Menzies kontinua servisu hamutuk ho Timor-Leste nia Ministériu Saúde no Ministeriu Agrikultura no Peskas, no Instituto Nacional de Saúde atu fornese apoiu tékniku hodi haforsa sistema saúde nian iha Timor-Leste.

Projetu hirak ne’e finansia husi UKaid, Fleming Fund Country Grant ba Timor-Leste, Australian Regional Immunisation Alliance no Departamentu Negósiu Estranjeiru no Komérsiu (DFAT), Governu Australia.

banner 336x280
banner 120x600
  • Share

Leave a Reply

Your email address will not be published. Required fields are marked *