Gleno, www.news-viptv.com – Hodi selebra loron Natal ho dame, Komando Polisia Nasional Timor-Leste (PNTL) Munisipiu Ermera apela ba nia komunidade sira atu selebra ho hakmatek no bandu tiru fugetis durante selebrasaun.
Komandante PNTL Munisipiu Ermera, Superintendente Polisia Ludgerio P. Madeira Lay informa atu asegura selebrasaun Natal lao ho diak no seguru, nia parte mos alende halo patrulla, sei halo check poin ba sasan kontra bandu sira hanesan fugetis no armas branka.
“Kalan ami lao patrulla lao ain no mos ho kareta. Li-liu iha merkado sira hodi kontrola joven sira no mos halo auto stop ba sasan sira ne’ebe kontra bandu hanesan Fugeti, armas brankas, no sira seluk ” hateten Superindentende Ludgerio Lay ba VIPTV iha Kuartel PNTL Munisipiu Ermera, Gleno, foin lais ne’e.
Maski ho numeru rekursu humanus ne’ebe menus, Komando PNTL Munisipiu Ermera sei halo kontrola nafatin atu komunidade sira bele selebra sira nia Natal ho seguru.
Komandante ne’e mos informa, durate tinan 2023, nia parte rejistu kazu asaltu/juvenil aas liu iha Munisipiu Ermera.
“Ita Ermera durante nee problema ne’ebe sempre akontese nee mak asaltu/juvenil. Maibe, agora situasaun normal,” nia dehan.