PN Fo Votus Unanimidade ba Programa IX Governu Konstitusional

DILI, www.news-viptv.com – Reprezentante povu iha Parlamentu Nasional fo votus unanimidade ba programa IX Governu Konstitusional ne’ebe lideradu hosi Primeiru-Ministru Kay Rala Xanana Gusmão.

Votu unanimidade ne’ebe PN fo ne’e hatun matan-we’en Xanana Gusmão ne’ebe lori situasaun iha plenaria laran hamosu atmosfera triste tamba foin ba dahuluk opozisaun sira fo nia votus hodi aseita ba programa governu nian.

“Ha’u tenke dehan se ida ne’e ba nafatin iha ita nia rai no povu, tanba laos ita inimigu ba malu, maibè tanba povu ne’e, povu ne’e mak halo ita hamutuk, hamutuk iha hanoin, tanba ne’e mós maka lori naran governu ho partisipasaun ida kritika mais konstrutivu teb-tebes hosi imi hotu ha’u hakarak deklara iha ne’e katak, governu retira nia pedidu votu konfiansa, tanba imi fó tiha ona imi nia liafuan vale liu surat tahan ida,” deklara PM Xanana iha plenaria ba apresentasaun programa governu loron daruak, Kuarta (19/7/2023).

Xanana mos hatutan, “Dala barak teb-tebes ona mai iha uma fukun ida-ne’e, ohin ha’u bele dehan katak ho tempu la’o dadauk iha Konstrusaun Estadu no Konstrusaun Nasaun ho dezafiu no difikuldade ne’ebé ita mós ultrapasa tiha ona to’o agora povu bele fiar katak bainhira temi reafirmasaun Estadu Direitu Demokrátiku ita boot (deputadu/a) sira mak iha ne’e hamutuk ho ami  ita reafirma ida ne’e iha Estadu Direitu Demokrátiku. Ida-idak ho ninia funsaun ne’ebé Konstituisaun RDTL fó, mandatu ne’ebé povu fó ne’ebé ita nia hanoin ida de’it atu serbi rai ida ne’e. Ne’e duni ha’u dehan katak dezde 2007 to’o 2015 primeira vez mak ha’u mai fila iha ne’e, primeira vez maka debate iha Parlamentu Nasionál hatudu katak ita komesa ona hanorin ita nia joven sira no sosiedade maturidade politika”.

Lideransa orgaun exekutivu ne’ e hateten mos katak agora tempu ba mudansa no laos ona tempu atu kria inimigu ba malu, maibé buka de’it mak amigu hodi fó solusaun ba problema nasaun nian.

Hafoin deklarasaun Xanana nian ne’ e, deputadu sira hotu hamrik no basa liman hatudu sira nia respeitu no domin. Xefi Bankada FRETILIN, Aniceto Guterres lao kedan hakbesik Xanana no Xanana hakuak deputadu sira hotu.

Iha IX Governu Konstitusioonal, hamutuk iha programa 6 prioridade maka afirma filafali Estadu Direitu Demokrátiku, Dezenvolvimentu Kapitál Sosiál, Dezenvolvimentu infraestruturas, Dezenvolvimentu Ekonomia, Konsolidasaun Governativa no Boa Governasaun, no Kombate hasoru Korrupsaun. Programa hirak nee mak governu sei adota hodi implementa iha mandatu tinan lima hahú husi 2023-2028.

IX Governu Konstitusional harii hosi Partidu CNRT ho PD ne’ebe iha maioria parlamentar ho kadeira 37 no tuir kedan partidu opozisaun FRETILIN ho kadeira 19, KHUNTO 5 no PLP 4.