NIS Entrega Ekipamentu Elektroniku no Motorizada ba KRAM

DILI, www.news-viptv.com  –  Ministru Juventude, Desportu, Arte no Kultura, Nelyo Isaac Sarmento (NIS) entrega ekipamentu elektroniku no motorizada ba Komisaun Reguladora Arte Marsiais (KRAM) hodi fasilita sira nia servisu.

NIS hateten, ekipamentu no transporte ne’ebe fo atu reforsa instituisaun hodi responde ba preokupasaun publiku nian ba aktividade Arte Marsiais.

“KRAM no Sub KRAM sira atu hare’e deit ba papel importante ida ne’e, atu sai ponte ida entre estadu no sosiedade atu nune’e ajuda no rezolve problema sira ne’ebe edukasoens involve iha grupu arte marsiais, ne’e mak hau dehan ba Sub KRAM sira Ita iha informasaun barak tanba grupus sei gosta nafatin hadomi violensia, subar iha fatin ruma, ita nia obrigasaun atu informa ba komunidade no autoridade lokal sira hodi hatene aktividade arte marsias,” dehan NIS, Kinta (16/5/2025), iha Resintu MJDAK Lecidere, Dili.

Ekipamentu selektroniku no motorizada ne’e alende entrega ba KRAM, fahe mos ba Sub-KRAM sira iha munisipiu 12 no RAEOA.

Prezidenti KRAM, Oktavio da Conceição hateten dadauk ne’e KRAM kontinua halo kontrola ba atividade organizasaun Arte Marsiais tolu ne’ebe governu suspende nia atividade hanesan PSHT, IKS no KORK.

“Komisaun Reguladora sei aprezenta relatoriu ida ba ministru (MJDAK) hodi nune’e aprezenta ba Konsellu Ministru hodi bele hetan fali dezisaun foun oinsa mak bele hare’e nesesidade atu reativa fali arte marsiais ne’e depende ba membru nia komportamentu, depende ba treinador sira, depende ba lider sira tuir segundu diretiva KRAM ne’ebe mak uluk ita produs ou fahe ona ba tinan 2022 nian,” dehan Oktavio.