Nelyo Isaac: Troka Kultura Bele Hametin Relasaun Nasaun ho Nasaun

DILI, www.news-viptv.com – Eventu kultural ou troka kultura ne’ebe halao entre grupu kultura Japaun, Indonesia no Timor-Leste bele hametin relasaun entre nasaun ho nasaun, inklui nia sidadaun sira.

Ministru Juventude, Desportu, Arte no Kultura (MJDAK), Nelyo Isaac Sarmento iha nia intervensaun iha eventu kultura ne’ebe realiza hosi grupu kultura Japaun, Indonesia no Timor-Leste importante ba nasaun tolu tamba bele halo promosaun kultura nasaun ida iha nasaun seluk nian rai.

“Programa ida hanesan ne’e ba Timor-Leste importate. Oinsa maka atu hakbesik Timor ba mundu no maluk sira ne’ebe marka prezensa iha ne’e liliu sira ne’ebe husi ita nia vizinu sira dalaruma ita bo’ot sira kleur iha Timor konese diak konaba tradisaun kulturas liu husi buat oin-oin, liu husi ai-han, liu husi musika, liu husi dansa e liu husi buat sira ne’e atu ita konese maluk besik liu tan,” dehan Nelyo Isaac iha nia intervensaun, Sexta (4/8/2023), iha Pusat Budaya Indonesia, Mascarenhas, Dili.

Tuir ministru, eventu kultura ne’e maski ho diferensia kultura, atu fo korajem ba jovem Timoroan sira katak diferente ne’e laos atu sai inimigu.

“Ida maka haforti ita ema humanu mak ne’e, importante komprende, aprende husi situasaun seluk nasaun seluk e no mos buat ida ne’ebe ita iha tamba ne’e hau korajen ba ambaxador mai ita hamosu bebeik aktividade trokas de kulturas, troka malu bei-beik atu ita haforti malu bebeik,” dehan ministru.

Nia mos apela ba jovem sira hosi nasaun tolu ne’ebe hola prezensa iha eventu kultura ne’e atu uza oportunidade diak hodi troka hanoin, aprende no hametin relasaun ba malu.

Partisipa mos iha eventu maka, Embaixador Japaun ba Timor-Leste, Tetsuya Kimura, Okto Dorinu Manik (Embaixador Indonesia), Shin Mantaek (Embaixador Koreia Sul) no Embaixador Xina, Cuba, Malazia no estudante hosi eskola Colegio Paulo VI Dili.