Movimentu Atauro-Liran, Autoridade Seguransa Husu Komunidade Kumpri Lei

ATAURO, www.news-viptv.com – Komunidade Atauro husu ba Governu atu loke hikas movimentu entre Atauro no Liran-Indonezia ne’ebe durante ne’e lao ho tradisaun kultura.

Preokupasaun ne’e komunidade sira levanta wainhira partisipa iha dialogu entre autoridade Atauro ho Seguransa ne’ebe realiza foin lais ne’e iha Suku Biqueli, Atauro.

Desde taka provizoriumente iha vizita Papa Francisco, komunidade Atauro hasoru difikuldade iha sira nia rendementu ba vida moris nian tamba depende ba atividade peskas ne’ebe durante ne’e sempre buka ikan iha Liran, Indonesia.

Ho movimentu ne’ebe durante ne’e lao, autoridade seguransa no defeza fo hanoin no husu ba komunidade atu kumpri lei ne’ebe Timor-Leste iha tamba illa Atauro no Ilha Liran iha nia soberanu ida-idak nudar nasaun.

Hodi solusiona preokupasaun komunidade, Prezidenti Autoridade Atauro, Mateus Belo sei lori preokupasaun komunidade nian ba governu sentral nune’e bele hare dalan oinsa maka bele implementa.