Membru F-FDTL Nain 17 Hetan Promosaun Diviza

DILI, www.news-viptv.com – Xefé Estadu Maior FALINTIL-Forsa Defesa Timor-Leste (F-FDTL) Brigadeiro Jenerál Calisto Santos Coliati, Sexta (4/2/2022) ohin halo promosaun diviza ba membru F-FDTL nain 17.

Tuir komunikadu ne’ebe publika hosi Relasaun Informasaun Publika F-FDTL, membru F-FDTL nain 17 ne’e kompostu hosi ofisias superiores nain 2, ofisiais subalternos nain 3,Sarjentu 12, serimónia refere hala’o iha Kuartel Jenerál, F-FDTL Fatuhada, Dili.

Iha diskursu Xefé Estadu Maior FALINTIL-Forsa Defesa Timor-Leste (F-FDTL) Brigadeiro Jenerál Calisto Santos Coliati, hato’o parabens ba membru sira ne’ebe simu promosaun, ne’e hanesan amenta tan todan ida ba sira nain 17 nia kabas, durante sei hala’o kareira nudar Militar.

“Parabens ba imi sira ne’ebe foin simu promosaun, portanto promosaun hanesan ita nia Tenente Jenerál (reformadu nia sempre hatete, buat rua maka prinsípal, primeiro serví Nasaun no Estadu, Segundo serví família,” dehan Brigadeiro Jenerál Coliati.

Nia dehan tan,”Primeiro amenta tan responsabilidade ba ita bo’ot sira nia kabas, hanesan Militar ita bo’ot sira hatene ona, saida maka ita bo’ot sira sei hasoru iha imi nia kareira, depois de promosaun ita bo’ot sira sei koloka fila fali ba iha unidade operasionais atu nune’e imi bele integra didiak Servisu hanesan militar.”

Iha nia deskursu, jeneral fitun ida ne’e mos fo hanoin nafatin ba nia membru sira ne’ebe hetan promosaun diviza katak ho promosaun refere la signifika atu aumenta tan “dapur” ida seluk tan ba sira nia moris privadu.

“Husu nafatin ba imi mantein disiplina, responsabilidade, honestidade, senseridade iha ita bot sira nia kareira, responsabilidade no honestidade la’os deit iha instituisaun nia laran, maibe iha família uma laran mos.

Promosaun refere bazeia ba despacho No 001/CEMG F-FDTL/2020, decreto lei No 33/2020 tuir estatuto Militar F-FDTL, ne’ebe hetan despaco hosi Xefé Estadu Maior Jenerál FALINTIL-FDTL.