Kaderneta Passporte Hotu, Hahu 3 Janeiru DGSRN La Atende Halo Passporte

DILI, www.news-viptv.com – Diresaun Jeral Servisu Rejistu no Notariadu (DGSRN) sei la atende publiku ne’ebe atu halo passaporte komum no servisu hahu hosi 3 Janieiru tamba kaderneta hotu. 

“Liu hosi avizu ne’e fot hatene ba publiku tomak katak hahu dia 03 de Janeiro 2024 atendimentu passaporte komum ho servisu sei taka tamba stock kaderneta passaporte hotu ona,” hakerek karta avizu ne’ebe tau iha kuadru avizu iha edifisiu DGSRN ne’ebe asina hosi João Fernando Martins Borges nu’udar Diretor Jeral ho data 2 Janieiru 2024.

Laos deit la atende ba sira ne’ebe atu halo passaporte, karta avizu ne’e mos husu deskulpa ba publiku ne’ebe atu foti passaporte iha 9 to’o 12 Janieiru 2024, DGSRN mos labele entrega ho razaun laiha ona kadarneta.

“Ba sira nebe atu foti passaporte iha dia 09 de Janeiro to’o dia 12 de Janeiro de 2024, ami labele atende tamba stock kaderneta hotu. Ami husu diskulpa barak, husu hotu hotu nia pasiencia no kumpresaun hodi hein kaderneta foun nebe sei to’o tuir mai,” hakerek karta avizu ne’e ne’ebe valida mos ba munisipiu no RAEOA.

Karta avizu ne’e mos viral kedan iha media social tantu iha Facebook no mos grupu whatApps sira ne’ebe lamenta los ho avizu ne’e no kestiona ho servisu governu nian ne’ebe kontinua labele rezolve problema kaderneta passaporte.

“Não me digas kaderneta passaporte ida be 16.000 foin mai hotu fali tan one, ita nia nasaun prepara passaporte ne hanesan hola haknauk sasan iha merkadu. Buat ida simples deit mos ita bele rezolve ona ne ita nia nasaun ne atu lori ba nebe … prezente diak iha loron dahuluk 2024 nian. Nai Maromak mk hatene ba,” hakerek akun Antonio Gomes iha nia pajina Facebook.

Postingan seluk hosi akun Kiky Romon (https://web.facebook.com/kiky.santos.3) ho nia postingan “Nunee dt too Tinan oin 2025” iha oras rua nia laran deit konsege fahe tutan ho numeru 746 no hetan komentariu 26 hosi postingan original no resposta kuaze 80 resin.