Kada Tinan, Timor-Leste Hasai Biliaun 1 Sosa Sasan Importasaun

DILI, www.news-viptv.com – Banku Central Timor-Leste (BCTL) informa katak kada tinan, Timor-Leste hasai osan dolares amerikanu biliaun 1 hodi sosa deit sasan importasaun.

Iha Assembleia Jeral Annual Camara Comercio Industria TImor-Leste (CCI-TL), Governador BCTL, Helder Lopes hateten ho osan ne’ebe sai, nia husu atu autor ekonomia liliu emprezariu bele hanoin ona oinsa bele produz sasan ne’ebe Timor-Leste persiza hodi bele hamenus sosa sasan hosi rai liur.

“Ita tin-tinan osan besik biliaun ida ba liur. Ita hotu hatene ita nia rai ne’e importa sasan  barak, 1 biliaun hola sasan barak no mos materiais sira seluk ne’ebe hau hanoin sasan sira ita bele halo iha rai laran bele menus husi biliaun ida, 30 % bele hela iha Timor-Leste ajuda ekonomia ita hotu hotu nian ita kria impregu ba ita nia maluk Timor oan sira ita hare joven sira lao buka empregu halai tun halai sa’e, balu husik familia ba do’ok, ida nee ita hotu nia responsabilidade,” dehan Helder Lopes, Sexta (17/11/2023) iha Salaun Delta Nova, Dili.

Iha fatin hanesan, Prezidente CCI-TL Jorge Manuel de Araujo Serrano hateten, objetivu CCI-TL realiza Assembleia Jeral ne’e atu hare liu atividade ekonomia no emprezaria iha rai laran.

“Asembeleia annual ne’e atu deskuti planu atu iha avaliasaun saida maka halo tiha ona no saida maka seidauk lao. Ita bo’ot sira hatene katak komersiu organizasaun bo’ot ida ne’ebe liga ba aktividade ekonomika rai laran liliu ba emprezariu sira ne’e atu presiza koalia hare no halo avaliasaun ba organizasaun ne’e rasik, koalia ituan kona ba asuntu ekonomia rai laran, dezafiu ho oportunidade,” dehan Jorge Serrano.

Nune’e mos Sekretariu Estadu Koperativa, Arsenio Pereira da Silva hare katak setor privadu sira iha pepel importante hodi bele ajuda mos governu hamenus problema dezempregu ne’ebe sai preokupasaun ba Timoroan sira.

Iha ninia intervensaun hateten, katak tuir konstituisaun RDTL artigu 138 konsagra ona pilar ba dezenvolvimentu ekonómiku iha rai laran mai seitor tolu, maka hanesan, seitor públiku, privadu no kooperativas. Timor ninia ekonomia la’o diak depende papel no servisu husi seitór sira ne’e tenke koopera malu ho diak.